Radha: అందుకే మా జోడీ సూపర్ హిట్టయింది: చిరంజీవి పుట్టినరోజున రాధ స్పందన

తెలుగు చిత్రసీమలో మెగాస్టార్ చిరంజీవిది సువర్ణాక్షరాలతో లిఖించదగ్గ అధ్యాయం అయితే, రాధతో ఆయన కలిసి నటించిన చిత్రాలు తరగని గుబాళింపును అందించాయి. రాధ అందగత్తె మాత్రమే కాదు, అద్భుతమైన నటి, చురుకైన డ్యాన్సర్. ఆ రోజుల్లో చిరంజీవి, రాధ జోడీ స్టెప్పులు వేస్తుంటే థియేటర్లలో ఈలలు మార్మోగేవి. ఇవాళ మెగాస్టార్ పుట్టినరోజు. ఈ సందర్భంగా తన కథానాయకుడికి రాధ జన్మదిన శుభాకాంక్షలు తెలిపింది. సినిమా ఇండస్ట్రీకి గుడ్ బై చెప్పిన తర్వాత పెళ్లి చేసుకుని లైఫ్ లో సెటిలైన రాధ సోషల్ మీడియాలో ఎంతో యాక్టివ్ గా ఉంటుంది. తాజాగా, ట్విట్టర్ లో చిరంజీవికి బర్త్ డే విషెస్ తెలియజేసింది. 

"సినిమా ఇండస్ట్రీలో ఓ జోడీ సూపర్ హిట్టయింది అంటే... ఓ నటుడి గురించి ఆలోచిస్తే, అతడికి జోడీ అయిన ఆ నటీమణి కూడా గుర్తుకురావాలి. అలాగే ఆ నటీమణి గురించి ఆలోచిస్తే అతడికి సరిజోడీ అయిన ఆ నటుడు కూడా గుర్తుకు రావాలి. అలాంటి జోడీయే మాది. ఇప్పటికీ నన్ను అచ్చెరువొందించే అంశం ఒకటుంది. అభిమానులు నన్ను ఎప్పుడు కలిసినా... చిరంజీవి-రాధ పాటలు సూపర్బ్ అంటారు.

మా మధ్య అమోఘమైన కెమిస్ట్రీ ఉండేది. అంతకుమించిన అవగాహన ఉండేది. మా జోడీ ఎంతో ప్రజాదరణ పొందడానికి కారణం ఇదే. గొప్ప నటుడు కంటే కూడా చిరంజీవి అద్వితీయమైన డ్యాన్సర్. అంతకుమించి అసమాన వ్యక్తిత్వం ఆయన సొంతం. ప్రియమైన చిరంజీవి గారు మీకు పుట్టినరోజు శుభాకాంక్షలు. దేవుడు మీకు ఆయురారోగ్యాలు, సుఖశాంతులు ఇవ్వాలని కోరుకుంటున్నాను. అంతేకాదు, మీ తదుపరి చిత్రాలు బ్లాక్ బస్టర్ కావాలని ఆకాంక్షిస్తున్నాను" అంటూ రాధ ట్వీట్ చేసింది.