CPI Narayana: నారాయణ ఇంటికి విజయసాయిరెడ్డి... సీపీఐ నేత అర్ధాంగికి నివాళి
- అనారోగ్యంతో గురువారం నారాయణ భార్య వసుమతి మృతి
- జాబ్ మేళా ఏర్పాట్ల ప‌రిశీల‌న కోసం తిరుప‌తికి వచ్చిన సాయిరెడ్ది
- వసుమతికి నివాళి అర్పించిన వైసీపీ నేత
సీపీఐ జాతీయ కార్య‌ద‌ర్శి నారాయణ ఇంటికి వైసీపీ ప్రధాన కార్య‌ద‌ర్శి, వైసీపీ పార్ల‌మెంట‌రీ పార్టీ నేత వేణుంబాక విజయసాయిరెడ్డి వెళ్లారు. రాజ‌కీయంగా నిత్యం విమ‌ర్శ‌లు సంధించుకునే ఈ ఇద్ద‌రు నేత‌లు క‌ల‌వ‌డం ప్రాధాన్యం సంత‌రించుకుంది. నారాయణ భార్య వసుమతి దేవి గుండె సంబంధిత స‌మ‌స్య‌ల‌తో గురువారం మృతి చెందిన సంగ‌తి తెలిసిందే.
శ‌నివారం నుంచి తిరుప‌తిలో వైసీపీ నిర్వ‌హిస్తున్న జాబ్ మేళా ఏర్పాట్ల‌ను ప‌రిశీలించేందుకు సాయిరెడ్డి శుక్ర‌వారం తిరుప‌తి వెళ్లారు. ఈ సంద‌ర్భంగా సీపీఐ నేత ఇంటికి వెళ్లారు. వసుమతిదేవి పార్థివ దేహానికి నివాళులర్పించారు. నారాయణ, ఆయన కుటుంబ సభ్యులను సాయిరెడ్డి ప‌రామ‌ర్శించారు.
