సినిమా కబుర్లు.. సంక్షిప్త సమాచారం  

*  'ఆచార్య' సినిమాలో నటిస్తున్న మెగాస్టార్ చిరంజీవి దీని తర్వాత మూడు చిత్రాలను ఫైనల్ చేసిన సంగతి విదితమే. వీటిలో ఒకటి బాబీ దర్శకత్వంలో రూపొందే చిత్రం. ప్రస్తుతం ప్రీ ప్రొడక్షన్ పనులను జరుపుకుంటున్న ఈ చిత్రంలో శ్రుతిహాసన్ కథానాయికగా నటిస్తుందని గతంలో వార్తలొచ్చాయి. అయితే, తాజాగా బాలీవుడ్ భామ సోనాక్షి సిన్హా నటించే అవకాశాలు ఉన్నాయని తెలుస్తోంది.
*  మలయాళంలో హిట్టయిన 'అయ్యప్పనుమ్ కోషియమ్' చిత్రాన్ని తెలుగులో పవన్ కల్యాణ్, రానా దగ్గుబాటి హీరోలుగా రీమేక్ చేస్తున్న సంగతి విదితమే. సాగర్ కె చంద్ర  దర్శకత్వం వహిస్తున్న ఈ చిత్రం తొలి షెడ్యూలు షూటింగ్ జనవరిలో జరిగింది. తిరిగి రెండో షెడ్యూలును వచ్చే నెలలో తమిళనాడులోని గ్రామీణ ప్రాంతంలో నిర్వహించడానికి ప్లాన్ చేస్తున్నారు.
*  నాని కథానాయకుడుగా రూపొందుతున్న 'శ్యామ్ సింగరాయ్' చిత్రంలో ప్రముఖ నటుడు, దర్శకుడు రాహుల్ రవీంద్రన్ కీలక పాత్ర పోషిస్తున్నాడు. ఈ విషయాన్ని రాహుల్ వెల్లడిస్తూ, ఈ చిత్రంలో తాను సపోర్టింగ్ క్యారెక్టర్ చేస్తున్నానని పేర్కొన్నాడు. రాహుల్ సాంకృత్యాన్ దర్శకత్వంలో కోల్ కతా నేపథ్యంలో ఈ చిత్రం తెరకెక్కుతోంది.
*  మంచు మనోజ్ హీరోగా శ్రీకాంత్ ఎన్ రెడ్డి దర్శకత్వంలో 'అహం బ్రహ్మాస్మి' పేరిట ఓ పవర్ ఫుల్ సబ్జెక్టుతో ఓ సినిమా రూపొందుతోంది. ఇందులో మెగా హీరో సాయితేజ్ గెస్ట్ పాత్రలో నటిస్తాడంటూ వార్తలొస్తున్నాయి. మనోజ్, సాయితేజ్ మంచి మిత్రులన్న సంగతి తెలిసిందే!