లేదు.. జింబాబ్వే క్రికెట్‌లో ప్రభుత్వ జోక్యం అస్సలు లేదు: క్రీడల మంత్రి వివరణ

జింబాబ్వే క్రికెట్ బోర్డులో ప్రభుత్వ జోక్యం పెరిగిపోయిందంటూ ఇంటర్నేషనల్ క్రికెట్ కౌన్సిల్ (ఐసీసీ) ఆ జట్టుపై నిషేధం విధించింది. ఇది ఐసీసీ రాజ్యాంగాన్ని ఉల్లంఘించడమే అవుతుందని పేర్కొంటూ అంతర్జాతీయ క్రికెట్ నుంచి జింబాబ్వేను నిషేధించింది. ఐసీసీ నిర్ణయంతో ప్రభుత్వం సహా ఆ దేశ క్రికెటర్లు, అభిమానులు షాక్‌కు గురయ్యారు. జింబాబ్వే క్రికెటర్లు విషాదంలో మునిగిపోయారు. క్రికెట్‌నే నమ్ముకున్న వేలాదిమంది జీవితాలు దుర్భరంగా మారనున్నాయంటూ ఆవేదన వ్యకం చేస్తున్నారు.

కాగా, ఐసీసీ నిర్ణయంపై తాజాగా ఆ దేశ క్రీడా మంత్రి కిర్‌స్టీ కోవెంట్రీ స్పందించారు. ఐసీసీ ఆరోపణలను ఖండించారు. ఆ ఆరోపణల్లో వాస్తవం లేదని ఆమె స్పష్టం చేశారు. ఒలింపిక్ స్విమ్మింగ్ పతక విజేత అయిన మంత్రి కోవెంట్రీ మాట్లాడుతూ.. క్రికెట్ బోర్డులో ప్రభుత్వం ఏనాడూ తలదూర్చలేదని పేర్కొన్నారు. ఐసీసీ నిర్ణయం ఆటగాళ్ల భవిష్యత్తును నాశనం చేస్తుందని ఆవేదన వ్యక్తం చేశారు.