కోమటిరెడ్డికి శుభాకాంక్షలు తెలిపిన కేసీఆర్.. ధన్యవాదాలు చెబుతూనే, సెటైర్లు వేసిన కోమటిరెడ్డి

కాంగ్రెస్ ఎమ్మెల్యే, మాజీ మంత్రి కోమటిరెడ్డి వెంకటరెడ్డికి ముఖ్యమంత్రి కేసీఆర్ జన్మదిన శుభాకాంక్షలు తెలిపారు. శుభాకాంక్షలు తెలుపుతూ ఓ లేఖను కూడా పంపారు. 'మీకు హృదయపూర్వక జన్మదిన శుభాకాంక్షలు. నిండు నూరేళ్లు ఆయురారోగ్యాలతో ఉండాలని, ప్రజలకు సేవలు అందించాలని భగవంతుడిని కోరుకుంటున్నాను' అంటూ లేఖలో పేర్కొన్నారు. ఈ సందర్భంగా కోమటిరెడ్డి మాట్లాడుతూ, తనకు జన్మదిన శుభాకాంక్షలు తెలిపిన ముఖ్యమంత్రికి ధన్యవాదాలు తెలిపారు. ఇదే సమయంలో కేసీఆర్ పై కొన్ని సెటైర్లు వేశారు.

ఎమ్మెల్యేగా తనను గుర్తించిన ముఖ్యమంత్రి... ఇతర ప్రొటోకాల్ అంశాలను మాత్రం ఎందుకు పట్టించుకోవడం లేదని కోమటిరెడ్డి ప్రశ్నించారు. తనకు భద్రత, ఇతర సౌకర్యాలను కల్పించడాన్ని సీఎం పట్టించుకోవడం లేదని అన్నారు. గత అసెంబ్లీ సమావేశాల్లో స్పీకర్ పై దాడి చేశారంటూ కోమటిరెడ్డి, సంపత్ ల శాసనసభ సభ్యత్వాలను రద్దు చేసిన సంగతి తెలిసిందే. ఆ తర్వాత వారు హైకోర్టును ఆశ్రయించారు. వీరిద్దరికీ అనుకూలంగా తీర్పును వెలువరించిన కోర్టు... ఇద్దరి శాసనసభ సభ్యత్వాలను పునరుద్ధరించాలని ఆదేశించింది.
.