'మెర్సల్ ' డైరెక్టర్ కి ఎన్టీఆర్ గ్రీన్ సిగ్నల్?

తమిళంలో మంచి క్రేజ్ వున్న యువ దర్శకులలో అట్లీ కుమార్ ఒకరు. విజయ్ తో ఆయన చేసిన 'తెరి' .. 'మెర్సల్' చిత్రాలు భారీ విజయాలను అందుకున్నాయి. రికార్డు స్థాయి వసూళ్లను సొంతం చేసుకోవడమే కాకుండా .. విజయ్ కెరియర్లో చెప్పుకోదగిన సినిమాలుగా నిలిచాయి. ఈ నేపథ్యంలో తెలుగు హీరోలతో తెలుగులోనూ సినిమాలు చేయాలని అట్లీ కుమార్ భావించాడు.

ఆ మధ్య వరుసగా తెలుగు స్టార్ హీరోలను ఆయన కలిసినట్టుగా వార్తలు వచ్చాయి. వాళ్లలో తాజాగా ఎన్టీఆర్ స్పందించినట్టుగా సమాచారం. మంచి కథ కుదిరితే చేయడానికి తాను సిద్ధమని ఎన్టీఆర్ గ్రీన్ సిగ్నల్ ఇచ్చినట్టుగా చెబుతున్నారు. ప్రస్తుతం అట్లీ కుమార్ కూడా కొత్త ప్రాజెక్టులతో బిజీగా వున్నాడు. ఇక త్రివిక్రమ్ .. రాజమౌళి సినిమాలను ఎన్టీఆర్ పూర్తి చేయవలసి వుంది. ఆ తరువాత ఎన్టీఆర్ .. అట్లీ కుమార్ కాంబినేషన్లో ఒక సినిమా రూపొందే ఛాన్స్ ఉందని చెప్పుకుంటున్నారు.