బాలీవుడ్‌, సౌత్ చిత్ర పరిశ్రమల తేడాలను చెప్పిన కీర్తి సురేశ్

దక్షిణాది చిత్ర పరిశ్రమలో తన అద్భుత నటనతో గుర్తింపు తెచ్చుకున్న జాతీయ అవార్డు గ్రహీత కీర్తి సురేశ్, త్వరలో బాలీవుడ్‌లోనూ అలరించేందుకు సిద్ధమవుతోంది. ఈ సందర్భంగా సౌత్ ఇండస్ట్రీకి, హిందీ చిత్ర పరిశ్రమకు మధ్య ఉన్న పనితీరు తేడాలపై ఆమె ఆసక్తికర విషయాలను వెల్లడించింది. బాలీవుడ్‌లో ప్రి-ప్రొడక్షన్‌కు అత్యధిక ప్రాధాన్యం ఇస్తే, దక్షిణాది చిత్ర పరిశ్రమలో మాత్రం పనితీరు చాలా సహజంగా (స్పాంటేనియస్‌గా) సాగుతుందని వివరించింది.

తాజాగా తాను నటించిన ‘అక్క’ మూవీ ప్రమోషన్లలో భాగంగా సహ నటి రాధికా ఆప్టేతో కలిసి పాల్గొన్న ఓ ఇంటర్వ్యూలో కీర్తి మాట్లాడింది. “బాలీవుడ్‌లో వర్కింగ్ స్టైల్ చాలా భిన్నంగా ఉంటుంది. స్క్రిప్ట్ రీడింగ్స్, నటీనటులకు ముందస్తు శిక్షణ, ఇతర నటీనటులతో సమన్వయం వంటి ప్రి-ప్రొడక్షన్ పనులకు ఇక్కడ ఎక్కువ సమయం కేటాయిస్తారు. అదే సౌత్ విషయానికి వస్తే చాలావరకు స్పాంటేనిటీ కనిపిస్తుంది. ప్రత్యేకమైన పాత్రల కోసం ఎక్కువ కసరత్తు చేయాల్సి వస్తే తప్ప, సాధారణంగా పెద్దగా ప్రిపరేషన్ ఉండదు. కొన్నిసార్లు ఇతర నటీనటులను నేరుగా షూటింగ్ రోజే సెట్స్‌లో కలుస్తుంటాం. అయితే, ఈ రెండు పద్ధతుల్లో పనిచేయడం నాకు ఎంతో ఇష్టం” అని కీర్తి సురేశ్ వివరించింది.

ధర్మరాజ్ శెట్టి దర్శకత్వం వహించిన ‘అక్క’ చిత్రాన్ని వైఆర్ఎఫ్ ఎంటర్‌టైన్‌మెంట్ ప్రతిష్ఠాత్మకంగా నిర్మించింది. తన్వి అజ్మీ, మహేశ్ మంజ్రేకర్, అన్షుమన్ పుష్కర్, మోనికా పన్వార్ తదితరులు ఇందులో కీలక పాత్రల్లో నటించారు. ఈ కథలో తాను పోషించిన ‘భవాని’ పాత్ర గురించి కీర్తి మాట్లాడుతూ.. తన వారసత్వాన్ని కాపాడుకోవడానికి ఎంతటి కఠిన నిర్ణయాలైనా తీసుకునే బలమైన మహిళగా భవాని కనిపిస్తుందని తెలిపింది. రాధికా ఆప్టేతో కలిసి పనిచేయడం గొప్ప అనుభవమని, నెట్‌ఫ్లిక్స్ ద్వారా ప్రేక్షకుల ముందుకు వచ్చిన ఈ ప్రాజెక్ట్ అందరినీ ఆకట్టుకుంటోందని తెలిపింది.