ఏపీలో ఎంపీటీసీ, జడ్పీటీసీ ఎన్నికల కౌంటింగ్ ప్రారంభం.. సర్వత్ర ఉత్కంఠ

ఆంధ్రప్రదేశ్‌లో ఎంపీటీసీ, జడ్పీటీసీ ఎన్నికల ఓట్ల లెక్కింపు ప్రక్రియ ప్రారంభమైంది. రాష్ట్రవ్యాప్తంగా శనివారం ఉదయం 8 గంటలకు కౌంటింగ్ మొదలైంది. దీంతో బ్యాలెట్ బాక్సుల్లో నిక్షిప్తమైన అభ్యర్థుల భవితవ్యం మరికొన్ని గంటల్లో తేలనుంది. ఫలితాల కోసం సర్వత్రా ఉత్కంఠ నెలకొంది.

రాష్ట్ర ఎన్నికల సంఘం కౌంటింగ్‌కు అవసరమైన అన్ని ఏర్పాట్లను పూర్తి చేసింది. మొత్తం 582 జడ్పీటీసీ, 7,767 ఎంపీటీసీ స్థానాలకు గత గురువారం పోలింగ్ జరిగిన విషయం తెలిసిందే. ఉదయాన్నే కౌంటింగ్ కేంద్రాల వద్దకు రాజకీయ పార్టీల ఏజెంట్లు చేరుకున్నారు. అధికారులు వారిని క్షుణ్ణంగా తనిఖీ చేసిన తర్వాతే కేంద్రాల్లోకి అనుమతిస్తున్నారు.
ఎలాంటి అవాంఛనీయ ఘటనలు జరగకుండా కౌంటింగ్ కేంద్రాల వద్ద పోలీసులు భారీ బందోబస్తు ఏర్పాటు చేశారు. లెక్కింపు ప్రక్రియ దశలవారీగా కొనసాగనుండగా, సాయంత్రానికి పూర్తి ఫలితాలు వెలువడే అవకాశం ఉంది.