పెన్షనర్లకు అలర్ట్: నవంబర్ 30లోగా లైఫ్ సర్టిఫికెట్ ఇవ్వకపోతే పెన్షన్ కట్!

కేంద్ర, రాష్ట్ర ప్రభుత్వాలు, ఇతర ప్రభుత్వ రంగ సంస్థల నుంచి పెన్షన్ పొందుతున్న విశ్రాంత ఉద్యోగులకు ఇది ముఖ్యమైన గమనిక. ప్రతినెలా పెన్షన్ సక్రమంగా అందాలంటే, 2026 నవంబర్ 30వ తేదీలోగా తమ వార్షిక డిజిటల్ లైఫ్ సర్టిఫికెట్ (జీవన్ ప్రమాణ్ పత్రం) సమర్పించడం తప్పనిసరి. ఈ గడువులోగా సర్టిఫికెట్ అందజేయని వారికి డిసెంబర్ నెల నుంచి పెన్షన్ చెల్లింపులు తాత్కాలికంగా నిలిచిపోయే అవకాశం ఉంది.

పెన్షనర్ల సౌకర్యార్థం లైఫ్ సర్టిఫికెట్ సమర్పించే ప్రక్రియను ప్రభుత్వం చాలా సులభతరం చేసింది. దీని కోసం పెన్షన్ కార్యాలయాల చుట్టూ తిరగాల్సిన అవసరం లేకుండా బయోమెట్రిక్ ఆధారిత డిజిటల్ సేవలను అందుబాటులోకి తెచ్చింది. ఉద్యోగుల భవిష్య నిధి సంస్థ (EPFO) కూడా పలు ఆన్‌లైన్, ఇంటి వద్దకే సేవలను అందిస్తోంది. పెన్షనర్లు తమ స్మార్ట్‌ఫోన్‌లోని ఉమాంగ్ (UMANG) యాప్ ద్వారా ఫేస్ అథెంటికేషన్ ఉపయోగించి సులువుగా సర్టిఫికెట్‌ను సమర్పించవచ్చు. అలాగే ఇండియా పోస్ట్ పేమెంట్స్ బ్యాంక్ (IPPB) ద్వారా ఉచితంగా ఇంటి వద్దకే వచ్చి ఈ సేవలను అందిస్తోంది.

ఇవి మాత్రమే కాకుండా, చాలా ప్రభుత్వ, ప్రైవేటు రంగ బ్యాంకులు కూడా తమ ఖాతాదారులైన పెన్షనర్లకు డోర్‌స్టెప్ సేవలను అందిస్తున్నాయి. ఆన్‌లైన్ ప్రక్రియపై అవగాహన లేనివారు సమీపంలోని ఈపీఎఫ్ఓ కార్యాలయం లేదా కామన్ సర్వీస్ సెంటర్ (CSC)కు వెళ్లి కూడా తమ లైఫ్ సర్టిఫికెట్‌ను భౌతికంగా సమర్పించవచ్చు.

80 ఏళ్లు పైబడిన సీనియర్ సిటిజన్లకు అక్టోబర్ 1 నుంచే లైఫ్ సర్టిఫికెట్ సమర్పించే అవకాశం కల్పించగా, 80 ఏళ్లలోపు వారికి నవంబర్ 1 నుంచి ఈ సౌకర్యం అందుబాటులోకి వచ్చింది. అయితే, రెండు కేటగిరీల వారికీ చివరి గడువు మాత్రం నవంబర్ 30గానే ప్రభుత్వం నిర్ణయించింది.

ఒకవేళ ఎవరైనా గడువులోగా సర్టిఫికెట్ సమర్పించలేకపోయినా ఆందోళన చెందాల్సిన అవసరం లేదు. దీనికి ఎలాంటి జరిమానా విధించరు. వారు ఎప్పుడు సర్టిఫికెట్ సమర్పిస్తే, ఆ వివరాలు అప్‌డేట్ అయిన తర్వాత నిలిచిపోయిన పెన్షన్‌ను బకాయిలతో సహా తదుపరి చెల్లింపు సైకిల్‌లో విడుదల చేస్తారు. పెన్షనర్ల సంక్షేమానికి ప్రభుత్వం కట్టుబడి ఉందని, డిజిటల్ సేవలను విస్తృతంగా వినియోగించుకోవాలని కేంద్ర మంత్రి డాక్టర్ జితేంద్ర సింగ్ ఇటీవలే పిలుపునిచ్చారు. 17వ పెన్షన్ అదాలత్‌లో 897 దీర్ఘకాలిక కేసుల్లో 756 కేసులను (84.2%) పరిష్కరించినట్లు ఆయన గుర్తు చేశారు.