కిరణ్ తో సాయి దుర్గ తేజ్ నిశ్చితార్థం.. ఒక్క ఫొటోతో క్లారిటీ ఇచ్చేసిన రామ్ చరణ్

మెగా కుటుంబంలో మరో పెళ్లి బాజాలు మోగనున్నాయి. సుప్రీం హీరో సాయి దుర్గ తేజ్ త్వరలోనే వివాహ బంధంలోకి అడుగుపెట్టబోతున్నారు. గత కొన్ని రోజులుగా ఆయన పెళ్లిపై వస్తున్న ఊహాగానాలకు మెగా పవర్ స్టార్ రామ్ చరణ్ తన సోషల్ మీడియా పోస్టుతో పూర్తి స్పష్టత ఇచ్చారు. ఇవాళ జరిగిన నిశ్చితార్థం ఫంక్షన్ ఫొటోను చరణ్ పంచుకున్నారు. దీంతో మెగా అభిమానులు సంబరాలు చేసుకుంటున్నారు.

సాయి దుర్గ తేజ్ ఇవాళ తన ప్రేయసి కిరణ్‌తో ఘనంగా నిశ్చితార్థం చేసుకున్నారు. హైదరాబాద్‌ శివారులోని హిల్టన్ జెనోమ్ వ్యాలీ రిసార్ట్‌లో ఈ వేడుకను కుటుంబ సభ్యులు, అత్యంత సన్నిహితుల మధ్య సంప్రదాయబద్ధంగా నిర్వహించారు. వీరి వివాహం డిసెంబర్ 10న హైదరాబాద్‌లోనే జరగనున్నట్టు కుటుంబ సభ్యులు ప్రకటించారు.

ఈ నిశ్చితార్థ వేడుకలో సాయి దుర్గ తేజ్, కిరణ్ ఒకరికొకరు ఉంగరాలు మార్చుకున్నారు. ఈ కార్యక్రమానికి మెగా, అల్లు కుటుంబాలు పూర్తిస్థాయిలో హాజరై సందడి చేశాయి. చిరంజీవి-సురేఖ దంపతులు, రామ్ చరణ్, అల్లు అర్జున్-స్నేహారెడ్డి, వరుణ్ తేజ్-లావణ్య త్రిపాఠి తమ కుమారుడు వాయు తేజ్‌తో కలిసి వేడుకలో పాల్గొన్నారు. వీరితో పాటు నాగబాబు-పద్మజ, నిహారిక, అల్లు అరవింద్, పవన్ కల్యాణ్ పిల్లలు అకీరా నందన్, ఆద్య, అల్లు శిరీష్-నయనిక రెడ్డి, అల్లు బాబీ-నీలా షా తదితరులు హాజరై నూతన జంటను ఆశీర్వదించారు.

సాయి దుర్గ తేజ్ తల్లి విజయదుర్గ, ఆమె భర్త డాక్టర్ శివప్రసాద్, సోదరుడు వైష్ణవ్ తేజ్ ఈ వేడుకను దగ్గరుండి పర్యవేక్షించారు. చిత్ర పరిశ్రమ నుంచి మంచు మనోజ్-భూమా మౌనికారెడ్డి, నవీన్ విజయ కృష్ణ, నవదీప్, దర్శకుడు వెంకీ కుడుముల, హర్ష చెముడు, నిర్మాత హర్షిత్ రెడ్డి వంటి పలువురు స్నేహితులు హాజరయ్యారు.

ఈ నిశ్చితార్థంతో మెగా కుటుంబంలో పెళ్లి వేడుకలు అధికారికంగా ప్రారంభమైనట్లయింది. సాయి తేజ్ పెళ్లి వార్తతో అభిమానులు, సినీ ప్రముఖులు సోషల్ మీడియా వేదికగా శుభాకాంక్షలు తెలుపుతున్నారు. అందరూ ఇప్పుడు డిసెంబర్‌లో జరగబోయే వివాహ వేడుక కోసం ఆసక్తిగా ఎదురుచూస్తున్నారు.

సాయి తేజ్, ఆయనకు కాబోయే భార్య కిరణ్‌కు శుభాకాంక్షలు తెలుపుతూ రామ్ చరణ్ ఒక పోస్ట్ చేశారు. "ప్రియమైన సాయి దుర్గ తేజ్, కిరణ్‌కు అభినందనలు. ఈ అందమైన కొత్త ప్రారంభం మీకు అంతులేని ప్రేమను, ఆనందాన్ని ఇవ్వాలని కోరుకుంటున్నాను. మీ ఇద్దరినీ చూస్తుంటే చాలా సంతోషంగా ఉంది" అని చరణ్ తన పోస్టులో పేర్కొన్నారు. ఈ పోస్టుతో పాటు మెగా కుటుంబ సభ్యులందరూ కలిసి దిగిన ఒక ఫొటోను కూడా ఆయన పంచుకున్నారు. 

గత కొద్ది రోజులుగా సాయి దుర్గా తేజ్ పెళ్లి చేసుకోబోతున్నారని, నవంబర్ 5న హైదరాబాద్‌లో నిశ్చితార్థం, డిసెంబర్ 10న వివాహం జరగనుందని జోరుగా ప్రచారం జరిగింది. వధువు వివరాలను చాలా గోప్యంగా ఉంచడంతో అభిమానుల్లో ఆసక్తి నెలకొంది. ఇప్పుడు రామ్ చరణ్ పోస్టుతో సాయి దుర్గ తేజ్ పెళ్లి వార్త నిజమేనని తేలిపోయింది. వధువు పేరు 'కిరణ్' అని కూడా అధికారికంగా తెలియడంతో, మెగా అభిమానులు, సినీ ప్రియులు సోషల్ మీడియా వేదికగా సాయి తేజ్‌కు శుభాకాంక్షలు తెలుపుతున్నారు.