పరిషత్ ఎన్నికలు నిష్పక్షపాతంగా జరపాలి.. రాష్ట్ర ఎన్నికల సంఘాన్ని కోరిన వైసీపీ

రాష్ట్రంలో నేడు జరగనున్న ఎంపీటీసీ, జెడ్పీటీసీ ఎన్నికలను స్వేచ్ఛాయుత వాతావరణంలో, నిష్పక్షపాతంగా నిర్వహించాలని వైసీపీ డిమాండ్ చేసింది. ప్రతి పోలింగ్ కేంద్రంలోనూ తప్పనిసరిగా సీసీ కెమెరాలను ఏర్పాటు చేయడంతో పాటు వెబ్‌కాస్టింగ్ నిర్వహించాలని రాష్ట్ర ఎన్నికల కమిషన్‌ (ఎస్‌ఈసీ)ను కోరింది.

వైసీపీ రాష్ట్ర ప్రధాన కార్యదర్శి, ఎమ్మెల్సీ లేళ్ల అప్పిరెడ్డి నేతృత్వంలోని ప్రతినిధి బృందం విజయవాడలో రాష్ట్ర ఎన్నికల కమిషనర్‌ను కలిసి వినతిపత్రం సమర్పించింది. ఈ బృందంలో పార్టీ లీగల్ సెల్ అధ్యక్షుడు మనోహర్‌రెడ్డితో పాటు పలువురు ముఖ్య నేతలు ఉన్నారు.

అనంతరం లేళ్ల అప్పిరెడ్డి మీడియాతో మాట్లాడుతూ.. ఇటీవల జరిగిన మున్సిపల్ ఎన్నికల్లో కూటమి ప్రభుత్వం అధికార దుర్వినియోగానికి పాల్పడిందని ఆరోపించారు. నామినేషన్ల ప్రక్రియ నుంచి కౌంటింగ్ వరకు ప్రజాస్వామ్యాన్ని ఖూనీ చేశారని విమర్శించారు. వైసీపీ అభ్యర్థులను నామినేషన్లు వేయకుండా అడ్డుకున్నారని, రీకౌంటింగ్ పేరుతో ఫలితాలను తారుమారు చేశారని ధ్వజమెత్తారు. ఏలూరు, డోన్, ఒంగోలు వంటి పలు ప్రాంతాల్లో భారీగా అక్రమాలు జరిగాయని పేర్కొన్నారు.

మున్సిపల్ ఎన్నికల కౌంటింగ్ కేంద్రాలకు సంబంధించిన సీసీటీవీ ఫుటేజీని, బ్యాలెట్ పత్రాలను సురక్షితంగా భద్రపరచాలని వారు డిమాండ్ చేశారు. అక్రమాలకు బాధ్యులైన అధికారులపై న్యాయపరమైన చర్యలు తీసుకుంటామని హెచ్చరించారు. రాజకీయ కక్షసాధింపు చర్యల్లో భాగంగా తమ పార్టీ నేతలపై అక్రమంగా బైండోవర్ కేసులు నమోదు చేయకుండా చూడాలని కోరారు.

అక్రమాలపై ఇప్పటికే 15 సార్లు ఫిర్యాదులు చేసి, పెన్‌డ్రైవ్‌ల రూపంలో ఆధారాలు అందజేసినా ఎన్నికల కమిషన్ నుంచి సరైన స్పందన లేదని పార్టీ నేత నలమారు చంద్రశేఖర్‌రెడ్డి ఆవేదన వ్యక్తం చేశారు. ప్రతిపక్ష అభ్యర్థులకు రక్షణ కల్పించి, పోలీసుల వేధింపులకు అడ్డుకట్ట వేయాలని వారు ఎస్‌ఈసీని కోరారు.