నంబర్‌ 3లో కోహ్లీ కింగ్‌.. వన్డేల్లో 13 వేల పరుగులతో ప్రపంచ రికార్డు!

టీమిండియా స్టార్‌ బ్యాటర్‌ విరాట్‌ కోహ్లీ మరో అరుదైన ఘనత సాధించాడు. వన్డే క్రికెట్‌ చరిత్రలో మూడో స్థానంలో బ్యాటింగ్‌ చేస్తూ 13 వేల పరుగులు పూర్తి చేసిన తొలి ఆటగాడిగా రికార్డు సృష్టించాడు. న్యూజిలాండ్‌తో జరుగుతున్న తొలి వన్డేలో ఈ మైలురాయిని అందుకున్నాడు.

ఈ మ్యాచ్‌కు ముందు కోహ్లీ ఖాతాలో మూడో స్థానంలో బ్యాటింగ్‌ చేస్తూ 12,988 పరుగులు ఉన్నాయి. ఈ క్రమంలో 13 వేల పరుగుల మైలురాయిని చేరుకోవడానికి అతడికి మరో 12 పరుగులు అవసరమయ్యాయి. న్యూజిలాండ్‌తో మ్యాచ్‌లో ఆ పరుగులు సాధించడంతో ఈ ఘనతను తన ఖాతాలో వేసుకున్నాడు.

ఈ జాబితాలో ఆస్ట్రేలియా దిగ్గజం రికీ పాంటింగ్‌ రెండో స్థానంలో ఉన్నాడు. అతడు తన కెరీర్‌లో మూడో స్థానంలో బ్యాటింగ్‌ చేస్తూ 12,662 పరుగులు సాధించాడు. కోహ్లీ ఈ సంఖ్యను అధిగమించి అగ్రస్థానంలో నిలిచాడు. శ్రీలంక మాజీ కెప్టెన్‌ కుమార సంగక్కర 9,747 పరుగులతో మూడో స్థానంలో ఉన్నాడు. 

వన్డేల్లో మూడో స్థానాన్ని తనకు అత్యంత అనుకూలమైన స్థానంగా మార్చుకున్న కోహ్లీ.. ఈ ఘనతతో మరోసారి తన స్థాయిని చాటుకున్నాడు. ఇప్పటికే అంతర్జాతీయ వన్డేల్లో అత్యధిక పరుగులు చేసిన ఆటగాళ్ల జాబితాలో రెండో స్థానంలో ఉన్న అతడు, రికార్డుల వేటను కొనసాగిస్తున్నాడు.