వాంగ్‌చుక్ సంస్థకు లడఖ్ సర్కార్ షాక్.. స్కూల్ కార్యకలాపాలు నిలిపివేయాలని నోటీసు

లడఖ్‌లో ప్రముఖ పర్యావరణ ఉద్యమకారుడు సోనమ్ వాంగ్‌చుక్ కు మరో ఎదురుదెబ్బ తగిలింది. ఆయనకు చెందిన హిమాలయన్ ఇన్‌స్టిట్యూట్ ఆఫ్ ఆల్టర్నేటివ్స్, లడఖ్ (HIAL) ఆధ్వర్యంలోని 'డెసర్ట్ ఫ్లవర్ స్కూల్' కార్యకలాపాలను తక్షణమే నిలిపివేయాలని లడఖ్ కేంద్రపాలిత ప్రాంత ప్రభుత్వం ఆదేశాలు జారీ చేసింది. అవసరమైన అనుమతులు లేకుండా పాఠశాలను ప్రారంభించారని ఆరోపిస్తూ లేహ్ తహసీల్దార్ ఈ నోటీసులు జారీ చేశారు.

భూ కేటాయింపుల రద్దుపై ఇప్పటికే HIAL న్యాయస్థానంలో పోరాడుతున్న నేపథ్యంలో ఈ కొత్త వివాదం తెరపైకి వచ్చింది. HIAL వ్యవస్థాపకురాలు, వాంగ్‌చుక్ భార్య అయిన డాక్టర్ గీతాంజలి జె. అంగ్మోకు ఈ నోటీసులు అందజేశారు. జమ్మూకశ్మీర్, లడఖ్ హైకోర్టులో భూ వివాదంపై కేసు విచారణలో ఉన్నందున, దానిని ప్రభావితం చేసేలా ఎలాంటి చర్యలు చేపట్టవద్దని, యథాతథ స్థితిని కొనసాగించాలని నోటీసులో స్పష్టం చేశారు. పాఠశాల మేనేజింగ్ కమిటీ కోసం నిరభ్యంతర పత్రం (NOC) కోరుతూ సెప్టెంబర్ 22న గీతాంజలి దరఖాస్తు చేసుకున్నారని, కానీ ఆ అనుమతులు రాకముందే తరగతులు ప్రారంభించారని ప్రభుత్వం ఆరోపించింది.

ఈ వివాదం వెనుక 2018లో HIALకు ఫ్యాంగ్ థాంగ్‌లో ప్రత్యామ్నాయ విశ్వవిద్యాలయం ఏర్పాటు కోసం భూమిని కేటాయించారు. అయితే, లీజు నిబంధనలు పూర్తి చేయలేదని, విశ్వవిద్యాలయం ఏర్పాటు చేయలేదని ఆరోపిస్తూ 2025 ఆగస్టులో ప్రభుత్వం ఆ కేటాయింపులను రద్దు చేసింది. దీనిపై HIAL కోర్టును ఆశ్రయించగా, ప్రస్తుతం కేసు విచారణలో ఉంది. ప్రభుత్వ తాజా నోటీసులు నిరాధారమైనవని, దీనికి తాము ఇప్పటికే సమాధానం ఇచ్చామని HIAL సీఈఓ గీతాంజలి తెలిపారు.