'మురసు' తుపాను కల్లోలం.. ప్రకాశం జిల్లాలో హైఅలర్ట్!

బంగాళాఖాతంలో ఏర్పడిన 'మురసు' తీవ్ర తుపాను ఆంధ్రప్రదేశ్ తీరం వైపు వేగంగా దూసుకొస్తోంది. తీర ప్రాంత ప్రజలను తీవ్ర భయాందోళనలకు గురిచేస్తూ, ఇది క్రమంగా బలపడుతోంది. రాష్ట్ర విపత్తుల నిర్వహణ సంస్థ (APSDMA), రియల్ టైమ్ గవర్నెన్స్ సొసైటీ (RTGS) సోమవారం రాత్రి 8:20 గంటలకు విడుదల చేసిన తాజా బులెటిన్ ప్రకారం, ఈ తుపాను గత ఆరు గంటలుగా గంటకు 13 కిలోమీటర్ల వేగంతో పయనిస్తోంది. ప్రస్తుతం ఇది కావలికి కేవలం 70 కిలోమీటర్ల దూరంలో, నెల్లూరుకు 80 కిలోమీటర్లు, ఒంగోలుకు 90 కిలోమీటర్ల దూరంలో కేంద్రీకృతమై ఉంది. బాపట్ల, మచిలీపట్నం పట్టణాలకు 120 నుంచి 170 కిలోమీటర్ల దూరంలో ఉన్నట్లు అధికారులు తెలిపారు.

తుపాను తీరం దాటే సమయంలో పెను విధ్వంసం సృష్టించే అవకాశం ఉందని వాతావరణ శాఖ హెచ్చరిస్తోంది. తీరాన్ని సమీపించే కొద్దీ గంటకు 100 నుంచి 120 కిలోమీటర్ల వేగంతో బలమైన ఈదురు గాలులు వీస్తాయని అంచనా వేస్తున్నారు. ఈ గాలుల తీవ్రతకు భారీ వృక్షాలు, విద్యుత్ స్తంభాలు నేలకొరిగే ప్రమాదం ఉందని, సమాచార వ్యవస్థలకు అంతరాయం కలగవచ్చని అధికారులు హెచ్చరిస్తున్నారు. తుపాను ప్రభావంతో సముద్రం అల్లకల్లోలంగా మారి, అలలు ఉవ్వెత్తున ఎగిసిపడే అవకాశం ఉన్నందున మత్స్యకారులు ఎవరూ వేటకు వెళ్లరాదని ఇప్పటికే హెచ్చరికలు జారీ చేశారు.

ప్రకాశం జిల్లాపై అధిక ప్రభావం

ముఖ్యంగా, మురసు తుపాను ప్రభావం ప్రకాశం జిల్లాపై అధికంగా ఉండే అవకాశం ఉందని విపత్తుల నిర్వహణ సంస్థ స్పష్టం చేసింది. జిల్లాలోని పలు మండలాల్లో అతి భారీ నుంచి అత్యంత భారీ వర్షాలు కురుస్తాయని ప్రకటించింది. కొత్తపట్నం, ఒంగోలు రూరల్, చినగంజాం మండలాల్లో అత్యంత భారీ వర్షపాతం నమోదయ్యే అవకాశం ఉందని రెడ్ అలర్ట్ జారీ చేసింది. వీటితో పాటు నాగులుప్పాడు, ఒంగోలు అర్బన్, వేటపాళెం, టంగుటూరు, సింగరాయకొండ, ఉలవపాడు, మద్దిపాడు, గుడ్లూరు, జరుగుమిల్లి, సంతనూతలపాడు, కందుకూరు మండలాల్లో అతి భారీ వర్షాలు కురుస్తాయని పేర్కొంది.

ఈ హెచ్చరికల నేపథ్యంలో ప్రకాశం జిల్లా యంత్రాంగం పూర్తిగా అప్రమత్తమైంది. పైన పేర్కొన్న మండలాల్లోని ప్రజలు అత్యంత జాగ్రత్తగా ఉండాలని, ఇళ్ల నుంచి బయటకు రావద్దని అధికారులు విజ్ఞప్తి చేశారు. లోతట్టు ప్రాంతాల ప్రజలను సురక్షిత ప్రాంతాలకు తరలించేందుకు పునరావాస కేంద్రాలను సిద్ధం చేశారు. తుపాను కదలికలను ఎప్పటికప్పుడు నిశితంగా పరిశీలిస్తున్నామని, ఎలాంటి పరిస్థితినైనా ఎదుర్కొనేందుకు సిద్ధంగా ఉన్నామని RTGS, APSDMA అధికారులు తెలిపారు. అత్యవసర సహాయం కోసం ప్రభుత్వం మనమిత్ర (9552300009), కంట్రోల్ రూమ్ నంబర్లు 112, 1070, 18004250101 లను అందుబాటులో ఉంచింది. అలాగే, తుపానుకు సంబంధించిన తాజా సమాచారం కోసం 'AWAREE' యాప్‌ను డౌన్‌లోడ్ చేసుకోవాలని ప్రజలకు సూచించింది.