ఒమర్ అబ్దుల్లా రెండో పెళ్లిపై వివాదం.. ఇస్లాంకు విరుద్ధమన్న మత పెద్దలు

జ‌మ్మూక‌శ్మీర్ ముఖ్యమంత్రి ఒమ‌ర్ అబ్దుల్లా, ప్ర‌ముఖ జ‌ర్న‌లిస్ట్ నిధి ర‌జ్దాన్‌ను వివాహం చేసుకోవడం మతపరమైన వివాదానికి దారితీసింది. వారి పెళ్లి ఇస్లామిక్ సూత్రాలకు విరుద్ధమని, అది చెల్లదని ఆల్ ఇండియా ముస్లిం జమాత్ అధ్యక్షుడు మౌలానా ముఫ్తీ షాహ‌బుద్దిన్ ర‌జ్వీ బ‌రేల్వీ అభ్యంతరం వ్యక్తం చేశారు. 

షరియత్ చట్టం ప్రకారం, నిఖా జరగాలంటే వధూవరులిద్దరూ తప్పనిసరిగా ముస్లింలై ఉండాలని మౌలానా స్పష్టం చేశారు. ఒమర్ అబ్దుల్లా ముస్లిం అయినప్పటికీ, నిధి రజ్దాన్ ముస్లిం కాదని, ఆమె ఇస్లాం మతాన్ని స్వీకరించలేదని అన్నారు. కాబట్టి ఈ వివాహం ఇస్లామిక్ చట్టాల ప్రకారం చెల్లదని ఆయన పేర్కొన్నారు. ఒకవేళ నిఖాకు ముందే ఆమె మతం మారి ఉంటేనే ఆ పెళ్లికి గుర్తింపు ఉండేదని వివరించారు.

కాగా, "కొత్త ప్రయాణం మొదలైంది" అంటూ ఒమర్ అబ్దుల్లా శనివారం సోషల్ మీడియా ద్వారా నిధి రజ్దాన్‌తో తన వివాహ విషయాన్ని అధికారికంగా ప్రకటించారు. ఢిల్లీలో కుటుంబ సభ్యుల సమక్షంలో ప్రత్యేక వివాహ చట్టం కింద వీరి పెళ్లి జరిగింది. ఒమర్ అబ్దుల్లాకు ఇది రెండో వివాహం. ఆయన తన మొదటి భార్య పాయల్ నాథ్‌తో 2009 నుంచి విడిగా ఉంటున్నారు. ఈ ఏడాది జులై 31న సుప్రీంకోర్టు వీరికి పరస్పర అంగీకారంతో విడాకులు మంజూరు చేసింది.