పుట్టినరోజున నీతా అంబానీ గొప్ప సంకల్పం.. అనాథలు, వృద్ధుల కోసం 100 ఎకరాల్లో కేర్ టౌన్‌షిప్

రిలయన్స్ ఫౌండేషన్ చైర్‌పర్సన్ నీతా అంబానీ తన జన్మదినం సందర్భంగా ఒక భారీ మానవతా కార్యక్రమానికి శ్రీకారం చుట్టారు. మహారాష్ట్రలోని కర్జత్‌లో 100 ఎకరాల విస్తీర్ణంలో నిర్మించ తలపెట్టిన 'నీతా ముఖేష్ అంబానీ అనంత్ ఆశ్రయ్' కేర్ టౌన్‌షిప్‌కు ఆమె భూమి పూజ చేసి శంకుస్థాపన చేశారు. అనాథ పిల్లలు, వృద్ధులు, ప్రత్యేక అవసరాలున్న దివ్యాంగులతో సహా 5,000 మందికి పైగా నిరాశ్రయులకు ఇది జీవితకాల ఆశ్రయం కల్పించనుంది.

ముంబైకి సమీపంలోని కర్జత్‌లో జరిగిన ఈ కార్యక్రమంలో ముఖేష్ అంబానీ, ఇతర కుటుంబ సభ్యులు పాల్గొన్నారు. ఈ ప్రాజెక్ట్ ద్వారా సుమారు 5,000 మంది నివాసితులతో పాటు వారికి సేవలందించే సంరక్షకులు, వైద్య సిబ్బంది, వారి కుటుంబాలతో కలిపి మొత్తం 15,000 మందికి ఈ టౌన్‌షిప్ ఒక జీవనాధారంగా నిలుస్తుందని అంచనా వేస్తున్నారు. ఇది పూర్తిగా లాభాపేక్ష లేని ప్రాజెక్ట్ కావడం విశేషం.

ఈ సందర్భంగా నీతా అంబానీ మాట్లాడుతూ.. అత్యున్నత స్థాయి వైద్య సంరక్షణతో పాటు కుటుంబ తరహా వాతావరణం, విద్య, ఉపాధి అవకాశాలు, సామూహిక కార్యక్రమాలను ఒకేచోట అందించే సహాయక కేంద్రాన్ని సృష్టించడం తన వ్యక్తిగత నిబద్ధత అని తెలిపారు. నివాసితులకు కేవలం నీడ ఇవ్వడమే కాకుండా, వారి జీవితాల్లో వెలుగులు నింపేలా ఈ టౌన్‌షిప్‌ను తీర్చిదిద్దుతున్నట్లు వివరించారు.

ఈ టౌన్‌షిప్ నిర్మాణంలో ప్రత్యేకమైన ప్రణాళికను అనుసరిస్తున్నారు. పవిత్ర భారతీయ నదుల పేర్లతో 8 రెసిడెన్షియల్ విలేజ్‌లను ఏర్పాటు చేయనున్నారు. ప్రతి ఇంట్లో 'హౌస్ పేరెంట్స్'ను నియమించి, పిల్లలకు కుటుంబ వాతావరణాన్ని అందించనున్నారు. అంతేకాకుండా ఇక్కడ ఒక ప్రత్యేక ఆసుపత్రి, పునరావాస సేవలు, దేవాలయం, విశాలమైన ఉద్యానవనాలు, వ్యవసాయ క్షేత్రాలు, యువతకు ఉపాధి కల్పించేందుకు వృత్తి విద్యా శిక్షణా కేంద్రాలు కూడా ఏర్పాటు చేయనున్నారు. అవసరమైన అనుమతులు పొందిన తర్వాత దశలవారీగా ఈ ప్రాజెక్ట్‌ను అభివృద్ధి చేయనున్నట్లు రిలయన్స్ ఫౌండేషన్ ప్రకటించింది.