ట్రై సిరీస్ ఫైనల్లో పాక్ థ్రిల్లింగ్ విన్.. భారత్ 24 ఏళ్ల నాటి ప్రపంచ రికార్డు సమం

లాహోర్‌లోని గడ్డాఫీ స్టేడియంలో శనివారం జరిగిన వన్డే ట్రై సిరీస్ ఫైనల్లో పాకిస్థాన్ అద్భుత విజయం సాధించింది. ఉత్కంఠభరితంగా సాగిన ఈ మ్యాచ్‌లో శ్రీలంకపై మూడు వికెట్ల తేడాతో గెలిచి ట్రోఫీని కైవసం చేసుకుంది. ఈ విజయంతో పాకిస్థాన్ ఓ అరుదైన ప్రపంచ రికార్డును సమం చేసింది. వన్డే టోర్నమెంట్ ఫైనల్స్‌లో అత్యధిక లక్ష్య ఛేదన రికార్డును భారత్‌తో పంచుకుంది. 2002లో లార్డ్స్ వేదికగా ఇంగ్లండ్‌పై భారత్ 326 పరుగుల లక్ష్యాన్ని ఛేదించగా, సరిగ్గా 24 ఏళ్ల తర్వాత పాకిస్థాన్ కూడా అంతే స్కోరును ఛేదించి చరిత్ర సృష్టించింది.

ఈ మ్యాచ్‌లో ఫకర్ జమాన్ (127) ఆకాశమే హద్దుగా చెలరేగి పాక్ విజయంలో కీలక పాత్ర పోషించాడు. 326 పరుగుల భారీ లక్ష్య ఛేదనలో పాకిస్థాన్ ఆరంభంలో తడబడింది. 14 పరుగులకే మాజ్ సదాఖత్ (5), కెప్టెన్ బాబర్ ఆజం (0) వికెట్లను కోల్పోయి కష్టాల్లో పడింది. ఈ దశలో క్రీజులోకి వచ్చిన ఫకర్ జమాన్, వికెట్ కీపర్ సాద్ బేగ్ (74)తో కలిసి ఇన్నింగ్స్‌ను చక్కదిద్దాడు. వీరిద్దరూ మూడో వికెట్‌కు 149 పరుగుల భారీ భాగస్వామ్యం నెలకొల్పి జట్టును ఆదుకున్నారు.

సాద్ బేగ్ ఔటైన తర్వాత కూడా ఫకర్ జమాన్ తన జోరు కొనసాగించాడు. కేవలం 99 బంతుల్లో 11 ఫోర్లు, 6 సిక్సర్లతో 127 పరుగులు చేసి వన్డే ఫైనల్స్‌లో రెండు సెంచరీలు చేసిన రెండో పాక్ బ్యాటర్‌గా నిలిచాడు. జమాన్ ఔటయ్యాక శ్రీలంక మళ్లీ మ్యాచ్‌పై పట్టు బిగించే ప్రయత్నం చేసింది.

అయితే, ఆరో వికెట్‌కు హసన్ నవాజ్ (37నాటౌట్‌), అరాఫత్ మిన్హాస్ జతకలిసి కేవలం 50 బంతుల్లోనే 94 పరుగుల భాగస్వామ్యం నెలకొల్పారు. ముఖ్యంగా అరాఫత్ మిన్హాస్ కేవలం 31 బంతుల్లో 4 సిక్సర్లు, 3 ఫోర్లతో 61 పరుగులు చేసి మ్యాచ్‌ను పూర్తిగా పాకిస్థాన్ వైపు తిప్పాడు. చివరి ఓవర్లో ఉత్కంఠ నెలకొన్నప్పటికీ, కెప్టెన్ షాహీన్ అఫ్రిది సిక్సర్ బాది మరో 9 బంతులు మిగిలి ఉండగానే జట్టుకు చిరస్మరణీయ విజయాన్ని అందించాడు. అంతకుముందు కమిందు మెండిస్ (100) సెంచరీతో శ్రీలంక 50 ఓవర్లలో 325/8 స్కోరు చేసింది.