కడప, పులివెందులలో టెన్షన్.. వైసీపీ, టీడీపీ ఏజెంట్ల మధ్య తోపులాట

ఆంధ్రప్రదేశ్‌ మున్సిపల్‌ ఎన్నికల పోలింగ్‌ సందర్భంగా కడప, పులివెందులలోని పలు ప్రాంతాల్లో ఉద్రిక్త పరిస్థితులు నెలకొన్నాయి. పోలింగ్‌ కేంద్రాల వద్ద అధికార టీడీపీ, ప్రతిపక్ష వైసీపీ ఏజెంట్ల మధ్య వాగ్వివాదం చోటుచేసుకోవడంతో అది కాస్తా తోపులాటకు దారితీసింది. ఫలితంగా పోలింగ్‌ ప్రక్రియకు కొద్దిసేపు అంతరాయం ఏర్పడింది.

తమను పోలింగ్‌ కేంద్రాల్లోకి వెళ్లకుండా టీడీపీ ఏజెంట్లు అడ్డుకుంటున్నారని ఆరోపిస్తూ వైసీపీ ఏజెంట్లు ఆందోళనకు దిగారు. టీడీపీ ఏజెంట్లు తమ మొబైల్ ఫోన్లు పగలగొట్టి, చొక్కాలు చింపివేశారని ఆరోపించారు. దీంతో ఇరువర్గాల మధ్య వాగ్వివాదం ముదరడంతో పరిస్థితి మరింత ఉద్రిక్తంగా మారింది.

సమాచారం అందుకున్న పోలీసులు, భద్రతా సిబ్బంది తక్షణమే ఘటనా స్థలానికి చేరుకుని ఇరువర్గాలతో చర్చించారు. శాంతిభద్రతలకు విఘాతం కలిగిస్తే కఠిన చర్యలు తప్పవని గట్టిగా హెచ్చరించారు. పోలీసుల జోక్యంతో ఇరువర్గాలు శాంతించడంతో వివాదం సద్దుమణిగింది. అనంతరం పోలింగ్ ప్రక్రియ యథావిధిగా కొనసాగుతోంది.

ఓటర్లు క్యూలైన్లలో వేచి ఉండి తమ ఓటు హక్కును వినియోగించుకుంటున్నారు. ఓటర్ గుర్తింపు కార్డు లేనివారు ఆధార్ సహా ఇతర 12 రకాల గుర్తింపు కార్డులలో ఏదైనా ఒకటి చూపించి ఓటు వేయడానికి అధికారులు అనుమతినిస్తున్నారు.