ధనుష్ సంచలనం: పక్కా స్కెచ్‌తో రాజకీయాల్లోకి?.. 3000 మంది లాయర్లతో కొత్త వ్యూహం!

తమిళ సినీ పరిశ్రమలో మరో స్టార్ హీరో రాజకీయ ప్రవేశానికి సిద్ధమవుతున్నారా?.. అవుననే అంటున్నాయి ప్రస్తుత పరిణామాలు. ప్రముఖ నటుడు ధనుష్ రాజకీయ అరంగేట్రంపై గత కొంతకాలంగా జరుగుతున్న ప్రచారానికి బలం చేకూరుస్తూ, ఆయన అభిమాన సంఘం సంచలన నిర్ణయాలు తీసుకుంటోంది. ఇటీవలే అభిమాన సంఘాన్ని "ధనుష్ నర్పణి ఇయక్కం" (ధనుష్ సంక్షేమ ఉద్యమం)గా మార్చిన ఆయన, ఇప్పుడు రాష్ట్రవ్యాప్తంగా ఏకంగా 3,000 మంది న్యాయ సలహాదారులను నియమించేందుకు ప్రణాళికలు రచిస్తున్నట్లు తమిళ మీడియాలో కథనాలు వెలువడుతున్నాయి. ఇది ఆయన రాజకీయ రంగ ప్రవేశానికి పక్కా ప్రణాళికలో భాగమేనని విశ్లేషకులు భావిస్తున్నారు.

వివిధ మీడియా నివేదికల ప్రకారం, తమిళనాడులోని 234 అసెంబ్లీ నియోజకవర్గాల్లో, ప్రతి నియోజకవర్గానికి సుమారు 12 మంది చొప్పున న్యాయ సలహాదారులను నియమించాలని ధనుష్ బృందం భావిస్తోంది. క్షేత్రస్థాయిలో పనిచేసే సంస్థ కార్యకర్తలు, నిర్వాహకులు, అలాగే సాధారణ ప్రజలు ఎదుర్కొనే చట్టపరమైన, సామాజిక సమస్యలపై వీరు ఉచితంగా సలహాలు అందిస్తారు. నటుడు, ముఖ్యమంత్రి విజయ్ తన అభిమాన సంఘాలను ఇలాంటి సంక్షేమ కార్యక్రమాలతో బలోపేతం చేసి, ఆ తర్వాత 'తమిళగ వెట్రి కళగం'(టీవీకే) పేరుతో పార్టీని ప్రకటించిన విషయం తెలిసిందే. ఇప్పుడు ధనుష్ కూడా అదే బాటలో పయనిస్తున్నట్లు స్పష్టంగా కనిపిస్తోంది.

అక్టోబర్‌లోనే ధనుష్ తన అభిమాన సంఘానికి కొత్త జెండా, లోగోను ఆవిష్కరించి 'నర్పణి ఇయక్కం'గా మార్చారు. జిల్లా, నియోజకవర్గాల వారీగా కొత్త నిర్వాహకులను నియమిస్తూ సంస్థాగతంగా బలోపేతం చేస్తున్నారు. ఇందులో భాగంగా మహిళా విభాగం సమావేశాలు కూడా నిర్వహించారు. అంతేకాకుండా, 2027 జనవరి నుంచి రాష్ట్రంలోని అన్ని నియోజకవర్గాల్లో 10, 12వ తరగతి విద్యార్థుల కోసం ఏసీ సౌకర్యంతో ఉచిత ట్యూషన్ కేంద్రాలు ఏర్పాటు చేయాలనే ఆలోచనలో ఉన్నట్లు కూడా సమాచారం.

ఈ కార్యకలాపాలపై రాజకీయ పార్టీల నుంచి మిశ్రమ స్పందన వస్తోంది. కొందరు నేతలు దీన్ని బీజేపీ వ్యూహంగా చూస్తుంటే, మరికొందరు ధనుష్‌కు రాజకీయాల్లోకి వచ్చే హక్కు ఉందని వ్యాఖ్యానిస్తున్నారు. అయితే, ఈ ఊహాగానాలపై ధనుష్ గానీ, ఆయన ప్రతినిధులు గానీ ఇంతవరకు అధికారికంగా స్పందించలేదు. గతంలో 'తమిళగ ఎళుచ్చి కళగం' పేరుతో పార్టీ నమోదు చేశారన్న వార్తలను ఆయన సన్నిహిత వర్గాలు ఖండించాయి. ప్రస్తుతం ఆయన సినిమా ప్రాజెక్టులతో బిజీగా ఉన్నారని, ఆయన తాజా చిత్రం 'ఓం' త్వరలో విడుదల కానుందని చెబుతున్నారు. ఏది ఏమైనా, క్షేత్రస్థాయిలో జరుగుతున్న ఈ వ్యవస్థాగత మార్పులు ధనుష్ రాజకీయ అరంగేట్రానికి పక్కా పునాది వేస్తున్నాయని రాజకీయ వర్గాలు బలంగా నమ్ముతున్నాయి.