చంద్రబాబు ఫ్యాక్షనిజాన్ని రెచ్చగొడుతున్నారు: వైఎస్ అవినాశ్ రెడ్డి

వైసీపీ ఎంపీ వైఎస్ అవినాశ్ రెడ్డి, చంద్రబాబు నాయుడు ప్రభుత్వంపై తీవ్రస్థాయిలో విమర్శలు గుప్పించారు. గత మూడేళ్లలో ఏం అభివృద్ధి పనులు చేశారని ప్రజలను ఓట్లు అడుగుతారని ఆయన సూటిగా ప్రశ్నించారు. ఈరోజు ఆయన మీడియా సమావేశంలో మాట్లాడుతూ ప్రభుత్వంపై సంచలన ఆరోపణలు చేశారు.

పులివెందులలో వైసీపీ అభ్యర్థులను నామినేషన్లు వేయకుండా పోలీసులు అడ్డుకున్నారని అవినాశ్ రెడ్డి ఆరోపించారు. మధ్యాహ్నం 1.30 గంటలకు నామినేషన్లు వేయొచ్చని చెప్పి, ఆ తర్వాత మున్సిపల్ కార్యాలయం బయటే తమ వారిని నిలిపివేశారని, అనుమతి ఇవ్వబోమని స్పష్టంగా చెప్పారని ఆయన వివరించారు. ప్రశాంతంగా ప్రచారం కూడా చేసుకోనివ్వడం లేదని, ప్రచారంలో పాల్గొన్న వారి ఆస్తులపై దాడులు చేస్తున్నారని మండిపడ్డారు.

బయటి నుంచి పెద్ద సంఖ్యలో జనాలను తరలించి, ఏజెంట్లను, ఓటర్లను అడ్డుకుని దొంగ ఓట్లు వేయడానికి కుట్ర పన్నుతున్నారని అవినాశ్ రెడ్డి ఆరోపించారు. ఈ కుట్రకు డీఐజీ కోయ ప్రవీణ్ టీడీపీకి పూర్తిగా సహకరిస్తున్నారని వ్యాఖ్యానించారు. పులివెందులకు మెడికల్ కాలేజీ రాకుండా అడ్డుకున్నారని విమర్శించారు. హౌసింగ్ కాలనీల్లో ఒక్క రూపాయి పనైనా చేశారా? అని నిలదీశారు.

చంద్రబాబు ఫ్యాక్షనిజాన్ని రెచ్చగొడుతున్నారని విమర్శించారు. టీడీపీ కుట్రలను రాష్ట్ర ఎన్నికల సంఘం దృష్టికి తీసుకెళ్లామని తెలిపారు. "చంద్రబాబు గారూ... మీరు చేస్తున్న ఈ తప్పుడు పనులు చాలా దూరం వెళ్తాయి" అని ఆయన హెచ్చరించారు.