ఆర్మేనియా పార్లమెంట్‌లో ఎంపీల ముష్టియుద్ధం.. ప్రజలు చూడాలని లైవ్ ఆపని స్పీకర్!

ఆర్మేనియా పార్లమెంటులో అసాధారణ దృశ్యాలు ఆవిష్కృతమయ్యాయి. అధికార, ప్రతిపక్ష పార్టీల సభ్యుల మధ్య వాగ్వాదం తారాస్థాయికి చేరి తీవ్ర ఘర్షణకు దారితీసింది. ప్రత్యక్ష ప్రసారం జరుగుతుండగానే ఎంపీలు ఒకరిపై ఒకరు పిడిగుద్దులు కురిపించుకున్నారు, తన్నుకున్నారు. ఈ గొడవలో ఒక ఎంపీ కుర్చీ విసిరి దాడి చేయగా, మరొకరు నీళ్లు చల్లుకుని సభలో గందరగోళం సృష్టించారు.

గురువారం ఆర్మేనియా నేషనల్ అసెంబ్లీలో ఆడిట్ ఛాంబర్ సభ్యుడి ఎన్నికపై చర్చ జరుగుతున్న సమయంలో ఈ ఘటన చోటుచేసుకుంది. ప్రధాని నికోల్ పషిన్యాన్ నేతృత్వంలోని అధికార సివిల్ కాంట్రాక్ట్ పార్టీ ఎంపీ టరాన్ చఖోయాన్ మాట్లాడుతూ.. ప్రతిపక్ష స్ట్రాంగ్ ఆర్మేనియా పార్టీపై అవినీతి ఆరోపణలు చేశారు. ఆ పార్టీ నేత నరేక్ కారపెత్యాన్‌ను వ్యక్తిగతంగా టార్గెట్ చేస్తూ, ఆయన బంధువు చేసిన పాత వ్యాఖ్యలను గుర్తుచేశారు. దీంతో ఇరువురి మధ్య మాటల యుద్ధం మొదలైంది.

ఈ క్రమంలోనే నరేక్ కారపెత్యాన్ పోడియం వద్దకు దూసుకురావడంతో పరిస్థితి ఉద్రిక్తంగా మారింది. ప్రతిపక్ష ఎంపీ గార్నిక్ దావ్త్యాన్ తొలి పిడిగుద్దు విసిరారని స్పీకర్ తెలిపారు. అనంతరం సభ మొత్తం రణరంగంగా మారింది. డిప్యూటీ స్పీకర్ వాహగ్న్ అలెక్సాన్యన్ ఏకంగా ప్రతిపక్ష సభ్యులపైకి కుర్చీ విసిరారు. ఈ ఘర్షణలో ప్రతిపక్ష ఎంపీ ఆండ్రానిక్ గెవోర్గ్యాన్ ముక్కు పగిలి రక్తం కారగా, మరో ఎంపీ రూబెన్ ఖితార్యాన్ దుస్తులు చిరిగాయి. దీంతో పార్లమెంటు భవనం వద్దకు అంబులెన్స్‌ను పిలిపించారు.

కొద్దిసేపు ఘర్షణను చూస్తూ ఉండిపోయిన స్పీకర్ రూబెన్ రూబిన్యాన్, ఎంపీల ప్రవర్తనను ప్రజలు చూడాలనే ఉద్దేశంతోనే తాను ప్రత్యక్ష ప్రసారాన్ని కొనసాగించానని స్పష్టం చేశారు. అనంతరం సభను వాయిదా వేశారు. ఈ ఘటనపై స్పందించిన ప్రధాని నికోల్ పషిన్యాన్, హింసకు పూర్తి బాధ్యత ప్రతిపక్షాలదేనని ఆరోపించారు. తమ పార్టీ ఎంపీల చర్యలను సమర్థిస్తూ, కుర్చీ విసరడం "సరైన ప్రతిచర్య" అని వ్యాఖ్యానించడం గమనార్హం. ప్రతిపక్షాలు తమ స్థానం తెలుసుకోవాలని, లేదంటే ఇలాంటి పరిణామాలు తప్పవని హెచ్చరించారు. ఈ ఘటనకు సంబంధించిన వీడియోలు అంతర్జాతీయంగా వైరల్ అయ్యాయి.