నటిని కాకుంటే క్రికెటర్ అయ్యేదాన్ని: జయసుధ ఆసక్తికర వ్యాఖ్యలు

'ఒకవేళ మీకు వయసు తగ్గించుకుని గతంలోకి వెళ్లే అవకాశం వస్తే ఏం చేస్తారు?'... ఈ ఆసక్తికరమైన ఆలోచన చుట్టూ అల్లుకున్న కథే 'లవ్ ఆల్వేస్'. దక్షిణ కొరియాకు చెందిన ప్రముఖ వెబ్‌టూన్ 'వి ఆర్ సో ఓవర్... ఆర్ నాట్' ఆధారంగా రూపుదిద్దుకున్న ఈ తమిళ ఫాంటసీ రొమాన్స్ వెబ్ సిరీస్‌కు మధుమిత దర్శకత్వం వహించారు. గౌరీ కిషన్, రంజాన్ ముహమ్మద్, జయప్రకాశ్, సీనియర్ నటి జయసుధ ప్రధాన పాత్రలు పోషించారు. అక్టోబర్ 30న జియో హాట్‌స్టార్‌లో విడుదల కానున్న ఈ సిరీస్ సందర్భంగా నటీనటులు తమ అనుభవాలను, వ్యక్తిగత అభిప్రాయాలను పంచుకున్నారు. 

ఈ సిరీస్‌తోనే జయసుధ ఓటీటీలో అరంగేట్రం చేస్తున్నారు. మొదట వెబ్ సిరీస్‌లో నటించడానికి ఆరోగ్యం, సౌకర్యం దృష్ట్యా కాస్త సంకోచించినా, బలమైన పాత్ర మరియు అద్భుతమైన కథనం కావడంతో అంగీకరించినట్లు ఆమె తెలిపారు. తాను కొరియన్ కంటెంట్‌కు పెద్ద అభిమానినని, 'ఏజెంట్ కిమ్ రీయాక్టివేటెడ్', 'టీచ్ యూ ఎ లెసన్' వంటి సిరీస్‌లు చూశానని చెప్పారు. అంతేకాదు, ఓటీటీలో యాక్షన్ పాత్రలు చేయడానికి కూడా తాను సిద్ధంగా ఉన్నానని అన్నారు. 'గతంలోకి వెళ్లే అవకాశం వస్తే ఏం చేస్తారు?' అని అడగ్గా, తాను మద్రాసులోని చేపాక్ క్రికెట్ గ్రౌండ్ సమీపంలో పుట్టానని, నటిని కాకపోయి ఉంటే తన చిన్ననాటి అభిరుచి అయిన క్రికెట్‌ను కెరీర్‌గా ఎంచుకునేదాన్ని అని జయసుధ తన మనసులోని మాటను బయటపెట్టారు.

ఈ సిరీస్‌లో యువతిగా కనిపించే అనుభవజ్ఞురాలైన మహిళ పాత్రను పోషించారు గౌరీ కిషన్. ఈ పాత్ర ఎంతో సవాలుగా అనిపించిందని ఆమె అన్నారు. దర్శకురాలు మధుమిత 'ఫిమేల్ గేజ్' (స్త్రీ కోణం)తో కథను చెప్పిన విధానం తనను ఆకట్టుకుందని, సాధారణంగా హీరోయిన్లను 'క్యూట్‌'గా చూపించే ధోరణికి ఇది భిన్నంగా ఉందని ప్రశంసించారు. గతంలోకి వెళ్లే అవకాశం వస్తే, సినిమా షూటింగ్‌ల వల్ల పూర్తిగా ఆస్వాదించలేకపోయిన తన కాలేజీ రోజులను మళ్ళీ జీవించాలనుకుంటున్నట్లు గౌరీ తెలిపారు.

ఇక నటుడు జయప్రకాశ్ మాట్లాడుతూ, తనకు కొరియన్ కంటెంట్‌పై పెద్దగా అవగాహన లేనప్పటికీ, ఒక క్యారెక్టర్ ఆర్టిస్టుకు ఇంత ప్రాధాన్యమున్న పాత్ర లభించడం వల్లే ఈ ప్రాజెక్ట్‌కు అంగీకరించినట్లు చెప్పారు. షూటింగ్‌కు ముందు నిర్వహించిన రీడింగ్ సెషన్లు, ప్రణాళికాబద్ధమైన చిత్రీకరణ తనకు కొత్త అనుభవాన్ని ఇచ్చిందన్నారు. గతాంలోకి వెళ్లగలిగితే, తాను వ్యాపారవేత్తగా ఉన్న రోజులకు వెళ్లి, గతంలో చేసిన తప్పుల నుంచి నేర్చుకున్న పాఠాలతో మరింత విజయం సాధించడానికి ప్రయత్నిస్తానని ఆయన వివరించారు. ఈ సిరీస్ యువతరం ప్రేమకథతో పాటు, తరాల మధ్య ఉండే అనుబంధాలను కూడా ఆవిష్కరించనుంది.