అలాంటి నిరసనల్లో పాల్గొంటే ప్రభుత్వ ఉద్యోగాలకు అనర్హత.. యూపీ యోగి సర్కార్‌ నిర్ణయంపై ప్రతిపక్షాల ఫైర్‌

ఉత్తరప్రదేశ్‌లో ప్రభుత్వ ఉద్యోగాల కోసం ఎదురుచూస్తున్న అభ్యర్థుల వెరిఫికేషన్‌ విషయంలో యోగి ఆదిత్యనాథ్‌ ప్రభుత్వం కొత్త మార్గదర్శకాలు జారీ చేసింది. హింసాత్మక మార్గాల్లో అధికార మార్పిడి లక్ష్యంగా పనిచేసే సంస్థల్లో సభ్యులుగా ఉండటం, అలాంటి కార్యకలాపాల్లో పాల్గొనడం ఉద్యోగానికి అనర్హతగా మారవచ్చని స్పష్టం చేసింది. అయితే రాజకీయ సిద్ధాంతాలు వేరుగా ఉన్నాయనే కారణంతోనే ఉద్యోగం నిరాకరించరాదని కూడా పేర్కొంది. ఈ నిర్ణయంపై సమాజ్‌వాదీ పార్టీ, కాంగ్రెస్‌ విమర్శలు చేశాయి.

కొత్త నిబంధనల్లో ఏముంది?
రాష్ట్ర ప్రభుత్వ శాఖలతో పాటు ప్రభుత్వ సంస్థలు, మండళ్లు, స్థానిక సంస్థల్లో నేరుగా నియామకాలు పొందే అభ్యర్థులకు ఈ మార్గదర్శకాలు వర్తిస్తాయి. హింసాత్మక పద్ధతుల్లో ప్రస్తుత వ్యవస్థను మార్చాలని లక్ష్యంగా పెట్టుకున్న సంస్థల్లో సభ్యత్వం ఉండటం లేదా అలాంటి కార్యకలాపాల్లో పాల్గొనడం అనర్హతకు కారణం కావచ్చని ఉత్తర్వుల్లో పేర్కొన్నారు.

అభ్యర్థికి 21 ఏళ్లు నిండిన తర్వాత, వెరిఫికేషన్‌కు ముందు మూడేళ్ల వ్యవధిలో ఇలాంటి కార్యకలాపాల్లో పాల్గొన్నట్లు తేలితే, ఆ వ్యక్తి ఇంకా వాటిలో చురుగ్గా ఉన్నట్లు పరిగణించే అవకాశం ఉంది. అయితే ఈ మధ్య కాలంలో అతడి ప్రవర్తనలో సానుకూల మార్పు వచ్చినట్లు ఆధారాలు ఉంటే ఆ నిర్ణయాన్ని పునఃపరిశీలించవచ్చు.

కేవలం ఎఫ్‌ఐఆర్‌ నమోదైనంత మాత్రాన లేదా దర్యాప్తు కొనసాగుతున్నంత మాత్రాన అభ్యర్థిని ఉద్యోగానికి అనర్హుడిగా ప్రకటించరాదు. కేసుల్లో నిర్దోషిగా తేలినవారు, రాజీ ద్వారా పరిష్కారమైన కేసులు ఉన్నవారు, బాలల న్యాయ చట్టం పరిధిలోకి వచ్చే అంశాలు ఉన్నవారికి కూడా ఆటోమేటిక్‌గా అనర్హత వర్తించదని ప్రభుత్వం స్పష్టం చేసింది.

ప్రభుత్వంపై ప్రతిపక్షాల విమర్శలు
ఈ ఉత్తర్వులను సమాజ్‌వాదీ పార్టీ నేత ఉదయ్‌వీర్‌ బ్రిటిష్‌ పాలన కాలం నాటి విధానాలతో పోల్చారు. స్వతంత్ర భారతదేశంలో నిరసన తెలిపే హక్కు రాజ్యాంగం కల్పించిందని, ఎన్నికల ద్వారా అధికార మార్పిడి ప్రజాస్వామ్య ప్రక్రియలో భాగమని అన్నారు.

కాంగ్రెస్‌ నేత రషీద్‌ అల్వీ ఈ నిర్ణయాన్ని అతిగా ఉందని విమర్శించారు. ఇలాంటి అంశాల్లో ప్రభుత్వమే న్యాయనిర్ణేతగా వ్యవహరించడం సరైంది కాదని వ్యాఖ్యానించారు. 

వెరిఫికేషన్‌కు 30 రోజుల గడువు
పోలీసులు, స్థానిక నిఘా విభాగం (ఎల్‌ఐయూ) అభ్యర్థుల క్యారెక్టర్‌ వెరిఫికేషన్‌ నివేదికలను అభ్యర్థన అందిన 30 రోజుల్లోగా నియామక అధికారులకు సమర్పించాలి. నివేదిక ఆలస్యమైనంత మాత్రాన నియామక పత్రం ఇవ్వడం ఆపాల్సిన అవసరం లేదని ప్రభుత్వం తెలిపింది. అవసరమైన పత్రాలు, స్వీయ ధ్రువీకరణ తీసుకున్న తర్వాత తాత్కాలిక నియామక పత్రం ఇవ్వవచ్చు.

వెరిఫికేషన్‌లో అభ్యర్థి అనర్హుడిగా తేలినా, తప్పుడు సమాచారం ఇచ్చినా నియామకాన్ని రద్దు చేసి చట్టపరమైన చర్యలు తీసుకోవచ్చు. ప్రతికూల నివేదిక వచ్చిన సందర్భంలో అభ్యర్థి తన వాదనను ఆన్‌లైన్‌లో లేదా నేరుగా అధికారుల ముందు వినిపించే అవకాశం కల్పించాలి. ఇప్పటికే ప్రభుత్వ ఉద్యోగాల్లో ఉన్నవారికి మళ్లీ క్యారెక్టర్‌ వెరిఫికేషన్‌ తప్పనిసరి కాదని ఉత్తర్వులు స్పష్టం చేశాయి. అలహాబాద్‌ హైకోర్టు ఆదేశాల మేరకు ఈ మార్గదర్శకాలు జారీ చేసినట్లు సమాచారం.