భారత పైలట్ సాహసానికి యూఏఈ సలాం.. అత్యున్నత పురస్కారంతో సత్కారం

విమానంలో అత్యవసర పరిస్థితిని ఎదుర్కొని, అసామాన్య ధైర్యసాహసాలతో ప్రయాణికుల ప్రాణాలను కాపాడిన భారత పైలట్ కెప్టెన్ స్మిత్ మచ్చర్, ఫ్లైదుబాయ్ సిబ్బందిని యునైటెడ్ అరబ్ ఎమిరేట్స్ (యూఏఈ) ప్రభుత్వం అత్యున్నత పురస్కారంతో గౌరవించింది. విపత్కర పరిస్థితుల్లో వారి వృత్తి నైపుణ్యానికి గుర్తింపుగా 'ఫస్ట్ క్లాస్ ఆర్డర్ ఆఫ్ జాయెద్ II' పురస్కారాన్ని ప్రదానం చేసింది.

యూఏఈ అధ్యక్షుడు షేక్ మహమ్మద్ బిన్ జాయెద్ అల్ నహ్యాన్ తరఫున దుబాయ్ క్రౌన్ ప్రిన్స్ షేక్ హమ్దాన్ బిన్ మొహమ్మద్ బిన్ రషీద్ అల్ మక్తూమ్ ఈ పురస్కారాలను అందజేశారు. అంతకుముందు యూఏఈ అధ్యక్షుడు, వైస్ ప్రెసిడెంట్ షేక్ మొహమ్మద్ బిన్ రషీద్ సమక్షంలో ఈ సిబ్బందిని ప్రత్యేకంగా కలుసుకుని అభినందించారు. ప్రయాణికుల భద్రతకే తమ దేశం ప్రథమ ప్రాధాన్యత ఇస్తుందని, సిబ్బంది ధైర్యం ప్రశంసనీయమని యూఏఈ నాయకత్వం కొనియాడింది.

ఏం జరిగిందంటే..
గత సెప్టెంబర్ 30న ఫ్లైదుబాయ్ విమానంలో ఈ ఘటన చోటుచేసుకుంది. కాక్‌పిట్‌లో జరిగిన ఓ సంఘటనలో కెప్టెన్ స్మిత్ మచ్చర్ తీవ్రంగా గాయపడ్డారు. అయినప్పటికీ, ఆయన ధైర్యం కోల్పోకుండా ప్రాణాలకు తెగించి కాక్‌పిట్ డోర్‌ను తెరవగలిగారు. దీంతో సిబ్బంది, ప్రయాణికులు వెంటనే స్పందించి సహాయం అందించడంతో పెను ప్రమాదం తప్పింది. ఈ వీరోచిత చర్యకు గాను స్మిత్ అంతర్జాతీయంగా హీరోగా నిలిచారు.

ప్రపంచవ్యాప్తంగా ప్రశంసలు
కెప్టెన్ స్మిత్ ధైర్యంపై ప్రపంచవ్యాప్తంగా ప్రశంసల వర్షం కురుస్తోంది. భారత ప్రధాని నరేంద్ర మోదీ ఆయన్ను హీరోగా అభివర్ణించగా, ఇజ్రాయెల్ ప్రధాని బెంజమిన్ నెతన్యాహు ఆయన సాహసాన్ని కొనియాడారు. తీవ్రంగా గాయపడినా కాక్‌పిట్ డోర్ తెరిచినందుకు అమెరికా అధ్యక్షుడు డొనాల్డ్ ట్రంప్ కూడా ప్రశంసించారు. మరోవైపు, స్మిత్ గాయాల నుంచి కోలుకున్న తర్వాత ఆయనకు 'పౌర ధైర్యసాహస పురస్కారం' అందిస్తామని ఇజ్రాయెల్ ప్రకటించింది.

అంతకుముందు అక్టోబర్ 3న ఆసుపత్రిలో చికిత్స పొందుతున్న కెప్టెన్ స్మిత్‌ను షేక్ హమ్దాన్ స్వయంగా పరామర్శించి, ఆయన ధైర్యాన్ని, బాధ్యతాయుత ప్రవర్తనను ప్రశంసించారు. "మానవ ప్రాణాల పట్ల అత్యున్నత శ్రద్ధ, ధైర్యాన్ని స్మిత్ ప్రదర్శించారు. దేశ నాయకత్వం తరఫున ఆయనకు మా పూర్తి అభినందనలు" అని హమ్దాన్ సోషల్ మీడియాలో పేర్కొన్నారు.