ఏపీ తీరంపై అర్నాబ్ విలయం.. 150 కి.మీ. వేగంతో గాలులు, కుండపోత వర్షాలు

'అర్ణబ్' అతి తీవ్ర తుపాను ఆంధ్రప్రదేశ్ తీర ప్రాంతాల్లో విధ్వంసం సృష్టిస్తోంది. బుధవారం తెల్లవారుజామున బాపట్ల-విశాఖపట్నం మధ్య, యానాం సమీపంలో తీరం దాటడం ప్రారంభించిన ఈ తుపాను.. ప్రస్తుతం కాకినాడ, యానాం పరిసరాల్లో కేంద్రీకృతమై ఉంది. దీని ప్రభావంతో గంటకు 125 నుంచి 135 కిలోమీటర్ల వేగంతో బలమైన గాలులు వీస్తుండగా, కొన్ని సమయాల్లో గాలి వేగం గంటకు 150 కిలోమీటర్లకు చేరుకుంటోందని భారత వాతావరణ శాఖ  వెల్లడించింది.

తుపాను గంటకు కేవలం 3 కిలోమీటర్ల వేగంతో వాయవ్య దిశగా కదులుతోంది. ఈ నేపథ్యంలో తీరం దాటే ప్రక్రియ మరో మూడు గంటల పాటు కొనసాగవచ్చని ఐఎండీ అధికారులు అంచనా వేస్తున్నారు. ఈ తుపాను ప్రభావంతో తీర ప్రాంతాల్లో అతి భారీ వర్షాలు, భయంకరమైన సముద్రపు అలలు ఎగిసిపడుతున్నాయి. తుపాను తీరం దాటే సమయంలో సముద్రపు అలలు 1.5 నుంచి 2.5 మీటర్ల ఎత్తు వరకు ఎగిసిపడి లోతట్టు ప్రాంతాలను ముంచెత్తే ప్రమాదం ఉందని విశాఖ ఐఎండీ హెచ్చరించింది. ముఖ్యంగా కాకినాడ, యానాం, గోదావరి నదీ ముఖద్వారం వద్ద దీని ప్రభావం అధికంగా ఉంటుందని తెలిపింది.

తుపాను తీవ్రత దృష్ట్యా కాకినాడ పోర్టులో 10వ నంబర్ ప్రమాద హెచ్చరికను, విశాఖపట్నం, గంగవరం, భీమునిపట్నం పోర్టులలో 9వ నంబర్ ప్రమాద హెచ్చరికను జారీ చేశారు. ఇప్పటికే తుపాను ప్రభావం స్పష్టంగా కనిపిస్తోంది. యానాం సమీపంలోని జాతీయ రహదారి 216పై బలమైన గాలులకు చెట్లు కూలిపోయాయి. 

ముఖ్యమంత్రి చంద్రబాబు నాయుడు తుపాను పరిస్థితిని ఉన్నతాధికారులతో ఎప్పటికప్పుడు సమీక్షిస్తున్నారు. ముందుజాగ్రత్త చర్యగా ఏపీలోని మూడు విమానాశ్రయాల్లో విమాన సర్వీసులను రద్దు చేశారు. తుపాను పూర్తిగా తీరం దాటి బలహీనపడే వరకు ప్రజలు ఇళ్లకే పరిమితం కావాలని, సముద్ర తీరానికి వెళ్లవద్దని అధికారులు హెచ్చరికలు జారీ చేశారు.