అర్ణబ్ ఎఫెక్ట్ .. ఇంద్రకీలాద్రిపై ఘాట్ రోడ్డు తాత్కాలికంగా మూసివేత

అర్ణబ్ తుపాను హెచ్చరికల నేపథ్యంలో విజయవాడ ఇంద్రకీలాద్రిపై వెలసిన శ్రీ దుర్గామల్లేశ్వర స్వామివార్ల దేవస్థానం ఘాట్ రోడ్డును అధికారులు మంగళవారం నుంచి తాత్కాలికంగా మూసివేశారు. భారీ వర్షాలు, ఈదురుగాలుల కారణంగా కొండపై నుంచి రాళ్లు, మట్టి పెళ్లలు జారిపడే ప్రమాదం ఉందని గుర్తించిన అధికారులు, ముందస్తు జాగ్రత్త చర్యగా ఈ నిర్ణయం తీసుకున్నారు.

ఈ మార్గంలో వాహనాలు, భక్తుల రాకపోకలను పూర్తిగా నిలిపివేసినట్లు ఆలయ అధికారులు వెల్లడించారు. అయితే, అమ్మవారి దర్శనానికి వచ్చే భక్తులకు ఎటువంటి అసౌకర్యం కలగకుండా ప్రత్యామ్నాయ ఏర్పాట్లు చేశారు. ప్రస్తుతం మహామండపం మార్గం ద్వారా మాత్రమే భక్తులను దర్శనానికి అనుమతిస్తున్నారు. భక్తుల రద్దీని క్రమబద్ధీకరించేందుకు ఈ మార్గంలో ప్రత్యేక క్యూలైన్లు, సహాయ కేంద్రాలను ఏర్పాటు చేయడమే కాకుండా భద్రతా సిబ్బందిని మోహరించారు.

కొండపై రక్షణ చర్యలను ఇప్పటికే పటిష్టం చేసినట్లు అధికారులు వివరించారు. భక్తులు ఈ మార్పులను గమనించి, ఆలయ సిబ్బందికి సహకరిస్తూ సురక్షితంగా అమ్మవారిని దర్శించుకోవాలని దేవస్థానం కార్యనిర్వహణాధికారి (ఈవో) విజ్ఞప్తి చేశారు. పరిస్థితులు చక్కబడి, తదుపరి ప్రకటన వెలువడే వరకు ఘాట్ రోడ్డు మూసివేత కొనసాగుతుందని ఆయన స్పష్టం చేశారు.