డీఎస్పీ ఇన్బరాజ్‌గా సూర్య... 'సీన్' గ్లింప్స్ అదిరింది!

కోలీవుడ్ స్టార్ హీరో సూర్య కథానాయకుడిగా నటిస్తున్న తాజా చిత్రం 'సీన్' నుంచి చిత్ర బృందం అదిరిపోయే అప్‌డేట్‌ను విడుదల చేసింది. జితూ మాధవన్ దర్శకత్వంలో తెరకెక్కుతున్న ఈ సినిమా నుంచి సూర్య పోషిస్తున్న పాత్రను పరిచయం చేస్తూ "గ్లింప్స్ ఆఫ్ డీఎస్పీ ఇన్బరాజ్" పేరుతో సోమవారం ఒక ప్రత్యేక వీడియోను విడుదల చేశారు. ఈ చిత్రాన్ని నవంబర్ 6న దీపావళి కానుకగా ప్రపంచవ్యాప్తంగా విడుదల చేయనున్నట్లు ఈ సందర్భంగా ప్రకటించారు.

ఈ గ్లింప్స్ వీడియోలో డీఎస్పీ ఇన్బరాజ్  పాత్రను చాలా విలక్షణంగా, ఆసక్తికరంగా ఆవిష్కరించారు. క్రైమ్ సీన్‌కు చేరుకున్న ఇన్బరాజ్‌ను ఓ కానిస్టేబుల్ "సార్" అని పిలవాలా లేక "అన్నా" అని పిలవాలా అని అడగడం, అందుకు ఆయన "సార్" అని పిలవమని బదులివ్వడం నవ్వులు పూయిస్తుంది. కరోనా సమయంలో గుంపులుగా ఉన్న జనంపై సరదా వ్యాఖ్యలు చేస్తూ, రీల్స్ కోసం వర్టికల్‌గా వీడియోలు తీయమని సూచించడం ఆయన పాత్రలోని వైవిధ్యాన్ని తెలియజేస్తోంది. ఒకవైపు సిగరెట్ తాగవద్దని సలహా ఇస్తూనే, మరోవైపు తనే సిగరెట్ వెలిగించడం వంటి దృశ్యాలు ఆ పాత్ర స్వభావాన్ని ప్రతిబింబిస్తున్నాయి. మొత్తానికి, రొటీన్ పోలీస్ పాత్రలకు భిన్నంగా సూర్య క్యారెక్టర్ చాలా 'స్ట్రీట్ స్మార్ట్'గా ఉండబోతోందని ఈ గ్లింప్స్ ద్వారా స్పష్టమవుతోంది.

గతంలో 'సూర్య 47'గా ప్రచారంలో ఉన్న ఈ ప్రాజెక్టుపై భారీ అంచనాలు నెలకొన్నాయి. ఇందులో సూర్యకు జోడీగా నజ్రియా నజీమ్ నటిస్తుండగా, నస్లెన్ 'భావోద్వేగాలు లేని క్రూరమైన ప్రెడేటర్‌'గా 'ఈశ్వరన్' అనే ప్రతినాయకుడి పాత్రలో కనిపించనున్నాడు. జాన్ విజయ్, ఆనందరాజ్ తదితరులు ఇతర కీలక పాత్రలు పోషిస్తున్నారు. ఝగరం స్టూడియోస్ నిర్మిస్తున్న ఈ చిత్రానికి సుషిన్ శ్యామ్ సంగీతం అందిస్తున్నాడు.