డ్రంకెన్‌ డ్రైవ్‌లో హల్‌చల్.. కానిస్టేబుల్‌ను కొరికిన ర్యాపిడో డ్రైవర్.. వీడియో వైర‌ల్‌!

హైదరాబాద్‌ నగరంలో డ్రంకెన్‌ డ్రైవ్‌ తనిఖీల సందర్భంగా ఓ విచిత్ర ఘటన చోటుచేసుకుంది. మద్యం మత్తులో పట్టుబడిన ఓ ర్యాపిడో డ్రైవర్, విధుల్లో ఉన్న ట్రాఫిక్ కానిస్టేబుల్‌పై దాడి చేసి, కొరికి హల్‌చల్ చేశాడు. ఈ ఘటన చంద్రాయణగుట్ట సమీపంలో జరిగింది.

వివరాల్లోకి వెళితే.. ట్రాఫిక్‌ పోలీసులు చంద్రాయణగుట్ట వద్ద డ్రంక్ అండ్ డ్రైవ్‌ తనిఖీలు నిర్వహిస్తున్నారు. ఈ క్రమంలో అజీజ్ అనే ర్యాపిడో డ్రైవర్‌ను ఆపి పరీక్షించగా, అతడు మద్యం సేవించినట్లు తేలింది. దీంతో పోలీసులు అతడిని అదుపులోకి తీసుకునేందుకు ప్రయత్నించారు. ఈ సమయంలో పోలీసుల నుంచి తప్పించుకునేందుకు యత్నించిన అజీజ్, ఓ ట్రాఫిక్ కానిస్టేబుల్‌ను కొరికాడు.

అంతటితో ఆగకుండా రోడ్డుపై గట్టిగా అరుస్తూ హంగామా సృష్టించాడు. దీంతో అప్రమత్తమైన ఇతర పోలీసులు వెంటనే అతడిని అదుపులోకి తీసుకుని స్టేషన్‌కు తరలించారు. విధి నిర్వహణలో ఉన్న పోలీసుపై దాడి చేసినందుకు అజీజ్‌పై కేసు నమోదు చేసినట్లు అధికారులు తెలిపారు. ఈ ఘటనపై దర్యాప్తు కొనసాగుతోంది. డ్రంకెన్‌ డ్రైవ్‌లో పట్టుబడిన వ్యక్తి పోలీసుపైనే దాడికి పాల్పడటం స్థానికంగా కలకలం రేపింది.