‘ఆదర్శ కుటుంబం’ రిలీజ్.. హాలిడే ప్రకటించిన మల్లారెడ్డి కోడలు

విక్టరీ వెంకటేశ్ కథానాయకుడిగా నటించిన 'ఆదర్శ కుటుంబం' చిత్ర విడుదల నేపథ్యంలో మల్లారెడ్డి విద్యాసంస్థలు సెలవు ప్రకటించడం సర్వత్రా చర్చనీయాంశమైంది. అక్టోబర్ 30న ఈ చిత్రం ప్రేక్షకుల ముందుకు రానున్న తరుణంలో, అదే రోజున తమ విద్యాసంస్థలకు సెలవు ఇస్తున్నట్లు వైస్ చైర్మన్ ప్రీతి రెడ్డి అధికారికంగా ప్రకటించారు.

నేడు జరిగిన చిత్ర ట్రైలర్ విడుదల కార్యక్రమంలో ప్రీతి రెడ్డి ఈ విషయాన్ని వెల్లడించారు. విద్యార్థుల అభ్యర్థన మేరకే ఈ నిర్ణయం తీసుకున్నట్లు ఆమె స్పష్టం చేశారు. సినిమాను వీక్షించేందుకు వీలుగా సెలవు ఇవ్వాలని విద్యార్థులు కోరగా, దానికి ఆమె సానుకూలంగా స్పందించారు. ఈ ప్రకటనతో ప్రాంగణంలోని విద్యార్థులు, అభిమానులు పెద్ద ఎత్తున హర్షం వ్యక్తం చేశారు.

ఈ కార్యక్రమంలో ప్రీతి రెడ్డి ఎంతో ఉత్సాహంగా పాల్గొన్నారు. వేదికపై వెంకటేశ్ కలిసి ఆమె 'నారాయణమ్మ' పాటకు ఆకట్టుకునే రీతిలో స్టెప్పులేయడం ప్రత్యేక ఆకర్షణగా నిలిచింది. దీనికి సంబంధించిన వీడియోలు ప్రస్తుతం సామాజిక మాధ్యమాల్లో వైరల్‌గా మారాయి.