హైడ్రాపై పోలీస్ అధికారి పాట.. పుట్టినరోజున ఆవిష్కరించిన కమిషనర్ ఏవీ రంగనాథ్

విధి నిర్వహణలో బాధ్యతగా ఉంటూనే, తనలోని కళతో సామాజిక చైతన్యానికి పాటుపడుతున్నారు రాంగోపాల్‌పేట పోలీస్ స్టేషన్ సర్కిల్ ఇన్‌స్పెక్టర్ బోడసింగి సురేశ్ కుమార్. హైదరాబాద్ నగరంలో 'హైడ్రా' రాకతో వచ్చిన మార్పును వివరిస్తూ ఆయన ఆలపించిన ఓ ప్రత్యేక గీతాన్ని హైడ్రా కమిషనర్ ఏవీ రంగనాథ్ గురువారం ఆవిష్కరించారు. కమిషనర్ రంగనాథ్ జన్మదినం సందర్భంగా ఆయన చేతుల మీదుగా ఈ పాటను విడుదల చేయడం విశేషం.

గతంలో హైదరాబాద్ నగరం ఎలా ఉండేది, ఆక్రమణల వల్ల వరదలతో ఎలా మునిగిపోయేది, ప్లాస్టిక్ వ్యర్థాలతో డ్రైనేజీ కాలువలు ఎలా పూడుకుపోయాయో ఈ పాటలో వివరించారు. హైడ్రా వచ్చిన తర్వాత నగరం ఎలా సురక్షితంగా మారిందనే అంశాన్ని సురేశ్ కుమార్ తన గాత్రంతో ఆకట్టుకునేలా ప్రస్తావించారు. సురేశ్ కడారి రాసిన ఈ పాటకు కల్యాణ్ కీస్ సంగీతం అందించారు.

ఈ సందర్భంగా కమిషనర్ ఏవీ రంగనాథ్ మాట్లాడుతూ, సీఐ సురేశ్ కుమార్ ప్రయత్నాన్ని అభినందించారు. విధులను నిర్వర్తిస్తూనే, పాటల ద్వారా ప్రజల్లో చైతన్యం తీసుకురావడం ప్రశంసనీయమని అన్నారు. ఇటీవల గణేశ్ ఉత్సవాల సమయంలో డీజే సౌండ్స్‌పై సురేశ్ కుమార్ పాడిన పాట మంచి అవగాహన కల్పించిందని గుర్తుచేశారు.

గతేడాది కూడా కమిషనర్ రంగనాథ్ పుట్టినరోజున వలస బతుకులపై సురేశ్ కుమార్ ఓ పాటను విడుదల చేసిన సంగతి తెలిసిందే. ఇప్పుడు మరోసారి నగర సమస్యపై తన గళాన్ని వినిపించి అందరి మన్ననలు పొందుతున్నారు.