లంబోర్ఘిని కారులో జిమ్ క్లీనర్‌... మనసు గెలుచుకున్న హైదరాబాదీ వ్యాపారవేత్త

ఒకప్పుడు నెలకు రూ. 800 జీతానికి సేల్స్‌మ్యాన్‌గా పనిచేసిన హైదరాబాద్ వ్యాపారవేత్త ఒకరు, ఇప్పుడు తన లంబోర్ఘిని కారులో ఓ జిమ్ క్లీనర్‌ను కూర్చోబెట్టి నెటిజన్ల మనసు గెలుచుకున్నారు. కూరపాటి నాగ వెంకట రాకేష్ కుమార్ అనే ఈ వ్యాపారవేత్త, ఈ సంఘటనకు సంబంధించిన వీడియోను ఇన్‌స్టాగ్రామ్‌లో పంచుకోగా అది వైరల్ అయింది. ఈ ఘటన తన పాత రోజులను గుర్తు చేసిందని ఆయన పేర్కొన్నారు.

రాకేష్ కుమార్ రోజూ వెళ్లే జిమ్‌లో ఒక క్లీనర్ తన లంబోర్ఘిని కారును ఎంతో ఆసక్తిగా చూడటాన్ని గమనించేవారు. ఆ రోజు కూడా ఆ క్లీనర్ ఫ్లోర్ శుభ్రం చేస్తూ కారును చూసి ఒక ఫొటో తీసుకున్నాడు. ఇది చూసిన రాకేష్, అతడిని దాటుకుని వెళ్లకుండా దగ్గరకు వెళ్లి చేయి కలిపారు. అనంతరం కారు తాళాలు చేతికిచ్చి డ్రైవర్ సీట్లో కూర్చోమని చెప్పారు.

"నేను అతడికి నా కారు కీస్ ఇచ్చాను. అతడు స్టీరింగ్ వెనుక కూర్చున్న క్షణంలో నేను ఎప్పటికీ మర్చిపోలేనిది చూశాను. మొదట నమ్మశక్యం కాని ఆశ్చర్యం, ఆ తర్వాత స్వచ్ఛమైన ఆనందం అతడి కళ్లలో కనిపించాయి" అని రాకేష్ తన పోస్ట్‌లో రాశారు. కొన్ని సంవత్సరాల క్రితం తాను కూడా రూ. 800 జీతంతో బతుకుతున్న రోజుల్లో ఇలాగే సూపర్ కార్లను ఆరాధనగా చూసేవాడినని, కానీ చాలామంది యజమానులు తనను పట్టించుకునేవారు కాదని గుర్తుచేసుకున్నారు. భవిష్యత్తులో తాను అలాంటి కారు కొంటే ఎప్పుడూ అలా ప్రవర్తించకూడదని అప్పుడే నిర్ణయించుకున్నట్లు తెలిపారు.

"గౌరవానికి అయ్యే ఖర్చేమీ లేదు. ఒక కరచాలనానికి కూడా ఏమీ ఖర్చు కాదు. కొన్నిసార్లు మనం ఒకరికి ఇచ్చే అతిపెద్ద బహుమతి డబ్బు కాదు, వారి కల కూడా సాధ్యమవుతుందనే నమ్మకం" అని ఆయన అన్నారు. "పెద్ద కలలు కనండి. మీ వంతు వస్తుంది" అనే సందేశంతో తన పోస్ట్‌ను ముగించారు. ఈ వీడియోకు ఆన్‌లైన్‌లో లక్షలాది వ్యూస్, ప్రశంసలు వెల్లువెత్తుతున్నాయి. రాకేష్ కుమార్ వినయాన్ని పలువురు కొనియాడుతున్నారు.