మూడేళ్లలో రెట్టింపు టార్గెట్.. భారత్‌తో 500 బిలియన్ డాలర్ల వాణిజ్యమే అమెరికా లక్ష్యం

భారత్, అమెరికా మధ్య ద్వైపాక్షిక వాణిజ్య సంబంధాలను మరింత ఉన్నత స్థాయికి తీసుకెళ్లేందుకు అమెరికా ఒక భారీ లక్ష్యాన్ని నిర్దేశించుకుంది. రాబోయే మూడేళ్లలో ఇరు దేశాల మధ్య వాణిజ్యాన్ని 500 బిలియన్ డాలర్లకు పైగా పెంచాలని లక్ష్యంగా పెట్టుకున్నట్లు ప్రకటించింది. 

ప్రస్తుతం ఇది రికార్డు స్థాయిలో 240 బిలియన్ డాలర్లుగా ఉంది. అంటే.. ప్రస్తుత వాణిజ్యాన్ని రెట్టింపు కంటే ఎక్కువగా చేయాలనేది అమెరికా ప్రణాళిక. ముంబైలో జరిగిన 'ఫ్రీడమ్ 250' కార్యక్రమంలో భారత్‌లో అమెరికా రాయబారి సెర్జియో గోర్ ఈ కీలక విషయాన్ని వెల్లడించారు.

ఇటీవల అమెరికా అధ్యక్షుడు డొనాల్డ్ ట్రంప్, భారత ప్రధాని నరేంద్ర మోదీ మధ్య జరిగిన చర్చల్లో ఈ వాణిజ్య లక్ష్యంపై ఇరు నేతలు తమ నిబద్ధతను పునరుద్ఘాటించారని సెర్జియో గోర్ గుర్తుచేశారు. ఈ 500 బిలియన్ డాలర్ల లక్ష్యాన్ని అధిగమించడంపై అమెరికా ప్రత్యేకంగా దృష్టి సారించిందని ఆయన తెలిపారు. 

ముఖ్యంగా సెమీకండక్టర్లు, కీలక ఖనిజాలు, ఇంధనం, రక్షణ, సూపర్‌ఇంటెలిజెన్స్ వంటి వ్యూహాత్మక రంగాలలో వాణిజ్యాన్ని భారీగా విస్తరించాలని భావిస్తున్నట్లు వివరించారు.

భారత్, అమెరికా మధ్య సంబంధం కేవలం వాణిజ్యానికే పరిమితం కాదని, సముద్ర గర్భంలోని మౌలిక సదుపాయాల నుంచి అంతరిక్షం వరకు విస్తరించిందని రాయబారి గోర్ అభివర్ణించారు. భారత ఆర్థిక వ్యవస్థపై తమకున్న అపారమైన విశ్వాసానికి ముంబై నగరంలోనే 500కు పైగా ప్రధాన అమెరికన్ కంపెనీలు కార్యకలాపాలు నిర్వహించడమే నిదర్శనమని ఆయన పేర్కొన్నారు. 

ఈ కార్యక్రమంలో పాల్గొన్న అమెరికా విదేశాంగ మంత్రి మార్కో రూబియో కూడా మాట్లాడుతూ.. అనేక కీలకమైన అంశాలపై భారత్, అమెరికా మధ్య అసాధారణమైన ఏకాభిప్రాయం ఉందని, రెండు దేశాల మధ్య సమన్వయం బలంగా ఉందని వ్యాఖ్యానించారు. ఈ ప్రకటన ఇరు దేశాల మధ్య బలపడుతున్న ఆర్థిక, వ్యూహాత్మక భాగస్వామ్యానికి అద్దం పడుతోంది.