కుమార్తె పుట్టిన 9 నెలలకే.. జస్టిన్ బీబర్ మాజీ ప్రియురాలు సహారా రే అకాల మరణం

ఆస్ట్రేలియన్ మోడల్, స్విమ్‌వేర్ డిజైనర్ సహారా రే (34) అకాల మరణం చెందారు. లాస్ ఏంజెలెస్‌లోని ఒక ఆసుపత్రిలో చికిత్స పొందుతూ అక్టోబర్ 18న కుటుంబ సభ్యుల సమక్షంలో ఆమె తుదిశ్వాస విడిచినట్లు కుటుంబం ధ్రువీకరించింది. తొమ్మిది నెలల క్రితమే ఆమె స్నో అనే కుమార్తెకు జన్మనివ్వడం గమనార్హం.

మీడియా కథనాల ప్రకారం, అక్టోబర్ 16న ఫెంటానిల్ అనే డ్రగ్‌ను అధిక మోతాదులో తీసుకోవడంతో సహారా తీవ్ర అస్వస్థతకు గురయ్యారు. వెంటనే ఆమెను ఆసుపత్రికి తరలించగా, వైద్యులు లైఫ్ సపోర్ట్‌పై ఉంచి చికిత్స అందించారు. అయితే, ఆమె కోలుకునే పరిస్థితి లేకపోవడంతో కుటుంబ సభ్యులు లైఫ్ సపోర్ట్ తొలగించేందుకు అంగీకరించారు. అయితే, ఆమె మృతికి అధికారిక కారణాన్ని ఇంకా వెల్లడించలేదు.

ఆస్ట్రేలియా సర్ఫింగ్ దిగ్గజం టోనీ రే కుమార్తె అయిన సహారా మోడల్‌గా, సోషల్ మీడియా ఇన్‌ఫ్లుయెన్సర్‌గా మంచి పేరు తెచ్చుకున్నారు. తన పేరుతోనే ‘సహారా రే స్విమ్’ అనే బ్రాండ్‌ను కూడా ప్రారంభించారు. 2016లో పాప్ సింగర్ జస్టిన్ బీబర్‌తో హవాయిలో విహరిస్తున్న ఫొటోలు బయటకు రావడంతో ఆమె ప్రపంచవ్యాప్తంగా వార్తల్లో నిలిచారు.

గతంలో ఒక కారు ప్రమాదం తర్వాత సహారా ‘గులియన్ బారే సిండ్రోమ్’ అనే అరుదైన నరాల వ్యాధి బారిన పడ్డారు. దీనివల్ల కొంతకాలం ఆమె పాక్షిక పక్షవాతంతో బాధపడ్డారు. తన కుమార్తెను ‘నా ప్రపంచం’ అంటూ ఆమె చేసిన చివరి ఇన్‌స్టాగ్రామ్ పోస్ట్ అందరినీ కదిలిస్తోంది. సహారా మృతి పట్ల పలువురు ప్రముఖులు, అభిమానులు సోషల్ మీడియా వేదికగా సంతాపం తెలుపుతున్నారు. తమకు కొంత సమయం కావాలని, తమ ప్రైవసీకి భంగం కలిగించవద్దని ఆమె కుటుంబం విజ్ఞప్తి చేసింది.