ఫ్యాషన్ ప్రపంచంలోకి బిగ్‌బాస్ బ్యూటీ

టాలీవుడ్ నటి, బిగ్‌బాస్ ఫేమ్ వితిక షేరు నూతన రంగంలోకి అడుగుపెట్టింది. 'లవ్‌లిస్ట్' పేరుతో ఆమె తన సొంత ఫ్యాషన్ బ్రాండ్‌ను ప్రారంభించింది. దసరా పండుగ పురస్కరించుకుని ఈ విషయాన్ని సోషల్ మీడియా వేదికగా అభిమానులతో పంచుకున్న ఆమె, వ్యాపారవేత్తగా ఇది తన తొలి అడుగు అని పేర్కొంది.

మహిళల వస్త్ర ప్రపంచంలో ప్రత్యేక గుర్తింపు కోసం ఈ బ్రాండ్‌ను ఆమె తీర్చిదిద్దారు. మహిళల అభిరుచులకు అనుగుణంగా, వారి శైలిని ప్రతిబింబించేలా అద్భుతమైన డిజైన్లను అందించడమే 'లవ్‌లిస్ట్' ప్రధాన ఉద్దేశమని వితిక తెలిపింది. ఫ్యాషన్ డిజైనింగ్‌లో డిప్లొమా పూర్తి చేసిన తనకు, వస్త్ర వ్యాపార రంగంలోకి ప్రవేశించి సొంత బ్రాండ్‌ను నెలకొల్పాలన్నది చిరకాల వాంఛ అని ఆమె వెల్లడించింది.

ప్రముఖ నటుడు వరుణ్ సందేశ్‌ను వితిక వివాహం చేసుకున్న సంగతి తెలిసిందే. 'పడ్డానండి ప్రేమలో మరి' చిత్రంలో ఈ జంట వెండితెరపై అలరించింది. గత కొంతకాలంగా వెండితెరకు దూరంగా ఉన్నప్పటికీ, యూట్యూబ్ కంటెంట్ క్రియేటర్‌గా, ఇన్‌ఫ్లుయెన్సర్‌గా వితిక విశేష గుర్తింపు సాధించింది. త్వరలోనే హైదరాబాద్‌లో ఒక స్టోర్‌ను కూడా అందుబాటులోకి తీసుకురానున్నట్లు ఆమె ప్రకటించింది. ఈ క్రమంలో, వ్యాపార రంగంలోకి అడుగుపెట్టిన వితికకు అభిమానులు, నెటిజన్లు సోషల్ మీడియా వేదికగా అభినందనలు తెలియజేస్తున్నారు.