టైగర్ ష్రాఫ్‌పై కాల్పులు.. వర్మ స్పందన ఇదే!

బాలీవుడ్ యువ నటుడు టైగర్ ష్రాఫ్‌ను లక్ష్యంగా చేసుకుని జరిగిన కాల్పుల ఘటనపై ప్రముఖ దర్శకుడు రామ్ గోపాల్ వర్మ తనదైన శైలిలో స్పందించారు. ఇది మునుపెన్నడూ చూడని కొత్త పరిణామమని ఆయన విశ్లేషించారు.

సోషల్ మీడియా ప్లాట్‌ఫామ్ ఎక్స్‌లో వర్మ స్పందిస్తూ, "టైగర్ ష్రాఫ్‌తో జరిగిన సంఘటన మునుపెన్నడూ చూడనిది. బెదిరించి డబ్బు వసూలు చేయడం, కాంట్రాక్ట్ హత్యలు, సెటిల్‌మెంట్ల కోసం కాకుండా, మొదటిసారిగా కేవలం అహం కోసం, తమ ఘనతను చాటుకోవడం కోసం చంపాలని చూస్తున్నారు" అని పేర్కొన్నారు.

అక్టోబర్ 19న ముంబైలోని జుహూ ప్రాంతంలో ఉన్న పుష్పా నర్సీ పార్క్ సమీపంలోని ఓ ఫుట్‌బాల్ క్లబ్ వెలుపల ఈ ఘటన చోటుచేసుకుంది. ఈ కాల్పుల్లో టైగర్ ష్రాఫ్ సురక్షితంగా బయటపడ్డారు. ఈ ఘటనకు సంబంధించి ముగ్గురు అనుమానితులను రాజస్థాన్‌లోని కోటాలో అదుపులోకి తీసుకున్నారు.

ఈ దాడిపై పలువురు సినీ ప్రముఖులు తీవ్రంగా స్పందించారు. నటి ఊర్వశీ రౌతేలా మాట్లాడుతూ, "ఇది చాలా బాధాకరమైన విషయం. టైగర్, ఆయన కుటుంబానికి నా ప్రార్థనలు ఉంటాయి. అధికారులు దీనిపై చాలా వేగంగా చర్యలు తీసుకోవాలని కోరుకుంటున్నాను" అని అన్నారు.

నిర్మాత అశోక్ పండిట్ ఈ దాడిని తీవ్రంగా ఖండించారు. "ఫిల్మ్ ఇండస్ట్రీ తరఫున, డైరెక్టర్స్ అసోసియేషన్, ప్రొడ్యూసర్స్ గ్రూప్ పక్షాన ఈ దాడిని తీవ్రంగా ఖండిస్తున్నాను. దేవుడి దయవల్ల టైగర్ సురక్షితంగా ఉన్నారు. ఈ కష్ట సమయంలో మేమంతా జాకీ ష్రాఫ్ కుటుంబానికి అండగా నిలుస్తాం. ప్రస్తుతం జాకీ ష్రాఫ్ కుటుంబం ఎలాంటి మానసిక వేదన అనుభవిస్తోందో అర్థం చేసుకోగలను" అని తెలిపారు.

"ఇటీవల కాలంలో ఇండస్ట్రీపై ఇది రెండో దాడి. కొన్ని నెలల క్రితం దర్శకుడు రోహిత్ శెట్టి ఇంటిపై కూడా కాల్పులు జరిగాయి. ఈ ఘటనతో పరిశ్రమలో అభద్రతాభావం పెరిగింది" అని అశోక్ పండిత్ ఆందోళన వ్యక్తం చేశారు. ఈ ఘటనతో బాలీవుడ్‌లో ప్రముఖుల భద్రత అంశం మరోసారి చర్చనీయాంశంగా మారింది.