స్టాక్ మార్కెట్‌లో భారీ పతనం.. 876 పాయింట్లు నష్టపోయిన సెన్సెక్స్‌.. 22,900 దిగువకు నిఫ్టీ!

దేశీయ స్టాక్‌ మార్కెట్లు సోమవారం భారీ నష్టాలతో ముగిశాయి. బ్యాంకింగ్‌, ఐటీ షేర్లలో అమ్మకాల ఒత్తిడి పెరగడంతో మదుపర్ల సెంటిమెంట్‌ బలహీనపడింది. దీంతో బీఎస్‌ఈ సెన్సెక్స్‌ 876.37 పాయింట్లు (1.17 శాతం) నష్టపోయి 73,852.90 వద్ద ముగిసింది. ఎన్‌ఎస్‌ఈ నిఫ్టీ 257.20 పాయింట్లు (1.11 శాతం) పడిపోయి 22,888.95 వద్ద స్థిరపడింది. వరుసగా రెండు సెషన్లలో లాభాలు నమోదు చేసిన నిఫ్టీకి ఈ పతనంతో బ్రేక్‌ పడింది.

నిఫ్టీ కీలకమైన 23,000 మద్దతు స్థాయిని కోల్పోవడం మార్కెట్‌లో బలహీనతకు సంకేతమని నిపుణులు పేర్కొన్నారు. తక్షణ మద్దతు 22,800-22,820 స్థాయుల్లో ఉందని విశ్లేషకులు అంచనా వేశారు. ఈ స్థాయి దిగువకు పడిపోతే 22,650-22,700 పరిధిలో తదుపరి మద్దతు లభించే అవకాశముందని పేర్కొన్నారు. మరోవైపు, 23,000-23,186 స్థాయులను కీలక నిరోధాలుగా పరిగణించాలని సూచించారు. 

విస్తృత మార్కెట్లలోనూ అమ్మకాల ప్రభావం కనిపించింది. నిఫ్టీ మిడ్‌క్యాప్‌ 100 సూచీ 1.09 శాతం, నిఫ్టీ స్మాల్‌క్యాప్‌ 100 సూచీ 1.01 శాతం నష్టపోయాయి. రంగాల వారీగా చూస్తే నిఫ్టీ ప్రైవేట్‌ బ్యాంక్‌ సూచీ అత్యధికంగా పడిపోయింది. ఐటీ షేర్లలోనూ గణనీయమైన అమ్మకాలు నమోదయ్యాయి.

సెన్సెక్స్‌లో ఎస్‌బీఐ, అదానీ పోర్ట్స్‌ మాత్రం మార్కెట్‌ ధోరణికి భిన్నంగా ఒక్కొక్కటి 1 శాతానికి పైగా లాభపడ్డాయి. ఎల్‌అండ్‌టీ, ఇండిగో, మారుతి సుజుకి షేర్లు కూడా లాభాలతో ముగిశాయి. మరోవైపు యాక్సిస్‌ బ్యాంక్‌ అత్యధికంగా నష్టపోయింది. అల్ట్రాటెక్‌ సిమెంట్‌, ఇన్ఫోసిస్‌, బజాజ్‌ ఫైనాన్స్‌, ట్రెంట్‌ షేర్లలోనూ అమ్మకాల ఒత్తిడి కనిపించింది. కీలకమైన లార్జ్‌క్యాప్‌ షేర్లలో అమ్మకాలు పెరగడంతో గత రెండు సెషన్ల లాభాలు తుడిచిపెట్టుకుపోయాయని మార్కెట్‌ నిపుణులు విశ్లేషించారు.