డ్రైవర్ లేకుండానే రివర్స్‌లో దూసుకెళ్లిన టాటా ఎలక్ట్రిక్ కారు.. ఇదిగో వైరల్ వీడియో!

ఉత్తరప్రదేశ్‌లోని మెయిన్‌పురిలో ఓ వింత ఘటన చోటుచేసుకుంది. డ్రైవర్ లేకుండానే ఓ టాటా ఎలక్ట్రిక్ కారు దానంతట అదే కదలడం స్థానికంగా కలకలం రేపింది. జైల్ రోడ్డులో జరిగిన ఈ ఘటనలో పార్క్ చేసి ఉన్న కారు రివర్స్‌లో దూసుకెళ్లింది. ఈ దృశ్యాలు సీసీటీవీ కెమెరాలో రికార్డవ్వగా, ఆ ఫుటేజ్ సోషల్ మీడియాలో వైరల్ అయింది. అదృష్టవశాత్తూ ఈ ఘటనలో ఎవరికీ గాయాలు కాలేదు.

కారు యజమాని సౌరభ్ రాథోడ్ కథనం ప్రకారం.. తాను ఆఫీసులో ఉన్న సమయంలో ఈ ఘటన జరిగింది. తన మేనల్లుడు కారును శుభ్రం చేయడానికి బయటకు తీశాడు. ఆ సమయంలో కారులో కీ కూడా లేదు. అకస్మాత్తుగా కారు ముందుకు కదిలి, తన మేనల్లుడిని కిందపడేసి, ఆ తర్వాత దానంతట అదే వెనక్కి వెళ్లిందని ఆయన తెలిపారు. ఈ అనూహ్య పరిణామంతో అక్కడున్న వారు భయాందోళనలకు గురయ్యారు.

ఈ కారు టాటా టియాగో ఎలక్ట్రిక్ మోడల్ అని తెలిసింది. ఈ ఘటనతో తాను షాక్‌కు గురయ్యానని, వాహనంలో ఏదో టెక్నికల్ లోపం ఉందని అనుమానిస్తున్నానని రాథోడ్ చెప్పారు. ఈ విషయంపై కంపెనీకి ఫిర్యాదు చేయనున్నట్లు, అవసరమైతే కోర్టును కూడా ఆశ్రయిస్తానని ఆయన పేర్కొన్నారు. 

వైరల్ అయిన సీసీటీవీ ఫుటేజ్‌లో డ్రైవర్ లేకుండానే కారు కదులుతున్నట్లు స్పష్టంగా కనిపిస్తోంది. అయితే, కారు అలా అకస్మాత్తుగా కదలడానికి గల కచ్చితమైన కారణం ఇంకా తెలియరాలేదు. సాంకేతిక లోపంపై ఇప్పటివరకు ఎలాంటి అధికారిక నిర్ధారణ జరగలేదు.