ట్రంప్ దెబ్బ: సగానికి పడిపోయిన అమెరికాకు వలసలు.. 91 దేశాలపై కఠిన ఆంక్షలు!

అమెరికాలో ట్రంప్ ప్రభుత్వం ప్రవేశపెట్టిన కఠినమైన వీసా నిబంధనల కారణంగా చట్టబద్ధమైన వలసలు ఒక్కసారిగా సగానికి పడిపోయాయి. 2025 చివరలో తీసుకువచ్చిన ఈ కొత్త విధానాల వల్ల ఈ ఏడాది ఫిబ్రవరిలో అమెరికాకు వచ్చే వలసదారుల సంఖ్య గణనీయంగా తగ్గింది. ప్రభుత్వ డేటాను విశ్లేషించిన 'న్యూయార్క్ టైమ్స్' కథనం ప్రకారం ఈ పరిణామం అనేక దేశాల పౌరులపై తీవ్ర ప్రభావం చూపింది.

ట్రంప్ ప్రభుత్వం అధికారంలోకి రాకముందు అమెరికా స్టేట్ డిపార్ట్‌మెంట్ నెలకు సగటున 52,000 ఇమ్మిగ్రెంట్ వీసాలను జారీ చేసేది. ఈ వీసాలు పొందిన వారికి గ్రీన్ కార్డులు, శాశ్వత నివాస హోదా లభిస్తాయి. కానీ, కొత్త ఆంక్షల తర్వాత ఈ ఏడాది ఫిబ్రవరిలో కేవలం 26,000 వీసాలు మాత్రమే జారీ అయ్యాయి. ఇది ఏకంగా 50 శాతం తగ్గుదలను సూచిస్తోంది.

తాజా నిబంధనల వల్ల 91 దేశాల నుంచి పౌరులు అమెరికాకు వలస రావడం దాదాపు అసాధ్యంగా మారింది. మరో 61 దేశాల వారికి అందుబాటులో ఉన్న వీసాల సంఖ్యను కూడా గణనీయంగా తగ్గించారు. ఈ ఆంక్షల ప్రభావం ముఖ్యంగా ఆఫ్రికా, మధ్యప్రాచ్య దేశాలపై తీవ్రంగా పడింది. 

ముస్లిం-మెజారిటీ దేశాల నుంచి వలసలు 90 శాతానికి పైగా క్షీణించాయి. ప్రాంతాల వారీగా చూస్తే.. సెంట్రల్ ఆసియా నుంచి వలసలు 99%, ఆఫ్రికా నుంచి 89%, తూర్పు యూరప్ నుంచి 84%, ప‌శ్చిమాసియా నుంచి 81% మేర తగ్గాయి.

అయితే, ఈ ఆంక్షల నుంచి కెనడా, మెక్సికో దేశాలకు మినహాయింపు లభించింది. కెనడా నుంచి వలసలు 142 శాతం, మెక్సికో నుంచి 17 శాతం పెరగడం గమనార్హం. భద్రతాపరమైన తనిఖీలను కఠినతరం చేయడం, వలసదారులు ప్రభుత్వ సంక్షేమ పథకాలపై ఆధారపడే అవకాశాలను అంచనా వేయడానికే ఈ ఆంక్షలు విధించినట్లు ట్రంప్ ప్రభుత్వం చెబుతోంది. 

కేవలం ఇమ్మిగ్రెంట్ వీసాలు మాత్రమే కాకుండా, విద్యార్థులు, పర్యాటకులు, ఉద్యోగులు, వ్యాపారవేత్తలకు ఇచ్చే నాన్-ఇమ్మిగ్రెంట్ వీసాల జారీ కూడా తగ్గిందని నివేదికలు స్పష్టం చేస్తున్నాయి.