పుట్టిన గంటల్లోనే 'పోజ్' కొడుతున్న పసికందు.. సోషల్ మీడియాను షేక్ చేస్తున్న చిన్నారి వీడియో!

ఈజిప్టులోని కైరోలో ఓ నవజాత శిశువు పుట్టిన కొన్ని గంటల్లోనే ఇంటర్నెట్‌లో సెన్సేషన్‌గా మారాడు. అందుకు కారణం, ఆ పసికందు ఇచ్చిన ఓ అరుదైన, ప్రశాంతమైన పోజ్. ఈ వీడియో ప్రస్తుతం సోషల్ మీడియాలో విపరీతంగా వైరల్ అవుతోంది.

వివరాల్లోకి వెళితే.. కైరోలో పీడియాట్రిషియన్, నియోనాటాలజిస్ట్ అయిన డాక్టర్ ఇస్లాం ఎల్దే, ఓ శిశువుకు ప్రసవానంతర ప్రక్రియ పూర్తి చేశారు. అనంతరం గమనించగా, ఆ పసికందు ఒక కాలిపై మరో కాలు వేసుకుని, చుట్టూ ఏం జరుగుతున్నా పట్టించుకోకుండా ఎంతో రిలాక్స్‌డ్‌గా పడుకుని కనిపించాడు. ఈ అరుదైన భంగిమ చూసి ముచ్చటపడిన డాక్టర్, ఆ దృశ్యాన్ని వీడియో తీసి సోషల్ మీడియాలో పంచుకున్నారు.

ఈ వీడియో చూసిన నెటిజన్లు ఆశ్చర్యపోతూ, ఫన్నీగా కామెంట్లు చేస్తున్నారు. "అప్పుడే జీవితం అంటే ఏంటో ఈ చిన్నారికి తెలిసిపోయింది", "ఫొటో కోసం పోజ్ ఇస్తున్నట్టున్నాడు", "పుట్టగానే చిల్ అవుతున్నాడు" అంటూ యూజర్లు తమ స్పందనలు తెలియజేస్తున్నారు. సాధారణంగా నవజాత శిశువులు చురుగ్గా లేదా ఏడుస్తూ ఉంటారు. కానీ, అందుకు భిన్నంగా ఈ చిన్నారి ఎంతో ప్రశాంతంగా కనిపించడమే ఈ వీడియో వైరల్ కావడానికి కారణమైంది.