భారత్-విండీస్ టీ20: ఉప్పల్ స్టేడియానికి 2200 మంది పోలీసులతో భారీ భద్రత

హైదరాబాద్‌లోని ఉప్పల్ రాజీవ్ గాంధీ అంతర్జాతీయ క్రికెట్ స్టేడియం మరో అంతర్జాతీయ మ్యాచ్‌కు సిద్ధమైంది. అక్టోబర్ 14న రాత్రి 7 గంటలకు భారత్, వెస్టిండీస్ జట్ల మధ్య జరగనున్న నాలుగో టీ20 మ్యాచ్ కోసం మల్కాజ్‌గిరి పోలీస్ కమిషనరేట్ ఆధ్వర్యంలో అత్యంత పటిష్ఠమైన భద్రతా ఏర్పాట్లు చేస్తున్నారు. ఈ బందోబస్తు కోసం ఏకంగా 2,200 మంది పోలీసు సిబ్బందిని మోహరిస్తున్నట్లు అధికారులు తెలిపారు.

స్టేడియం లోపల, వెలుపల ఎలాంటి అవాంఛనీయ ఘటనలు జరగకుండా లా అండ్ ఆర్డర్, ట్రాఫిక్ పోలీసులు సమన్వయంతో పనిచేయనున్నారు. వీరితో పాటు షీ టీమ్స్, బాంబ్ డిటెక్షన్ స్క్వాడ్, స్పెషల్ ఆపరేషన్స్ టీమ్ (SOT) వంటి ప్రత్యేక బృందాలు కూడా రంగంలోకి దిగుతున్నాయి. స్టేడియంలో ఇప్పటికే ఉన్న 408 సీసీటీవీ కెమెరాలతో పాటు, పరిసర ప్రాంతాల్లో డ్రోన్ల ద్వారా కూడా నిఘా పెట్టనున్నారు. ప్రతి కదలికను కమాండ్ కంట్రోల్ సెంటర్ నుంచి పర్యవేక్షించనున్నారు.

మ్యాచ్‌కు వచ్చే ప్రేక్షకులు, మహిళలు, పిల్లల భద్రతకే ప్రథమ ప్రాధాన్యత ఇస్తున్నట్లు పోలీసులు స్పష్టం చేశారు. ఆటగాళ్ల భద్రత విషయంలోనూ ప్రత్యేక చర్యలు తీసుకుంటున్నారు. ట్రాఫిక్ సమస్యలు తలెత్తకుండా ముందస్తు ప్రణాళికలు సిద్ధం చేశారు.

ఈ సందర్భంగా మల్కాజ్‌గిరి పోలీస్ కమిషనర్ బి. సుమతి మాట్లాడుతూ.. మ్యాచ్ సజావుగా జరిగేందుకు అన్ని ఏర్పాట్లు పూర్తి చేశామన్నారు. "మీ భద్రత మా బాధ్యత – మీ సహకారం మా బలం" అని ఆమె పేర్కొంటూ, ప్రేక్షకులు పోలీసులకు సహకరించాలని విజ్ఞప్తి చేశారు.