షర్మిల కుమార్తె పెళ్లి డేట్ ఫిక్స్.. నిశ్చితార్థం, రిసెప్షన్ తేదీలు ఇవే!

ఏపీ కాంగ్రెస్ అధ్యక్షురాలు వైఎస్ షర్మిల ఇంట పెళ్లి సందడి నెలకొంది. ఆమె ఏకైక కుమార్తె వైఎస్ అంజిలి రెడ్డి వివాహం ఖరారైంది. సోమల రఘురామ్ రెడ్డితో అంజిలి రెడ్డి ఏడడుగులు వేయనున్నారు. ఈ శుభవార్తను షర్మిల స్వయంగా ప్రజలతో పంచుకున్నారు. వివాహానికి సంబంధించిన నిశ్చితార్థం, ముహూర్తం, రిసెప్షన్ తేదీలను ఆమె అధికారికంగా వెల్లడించారు.

ఈ సందర్భంగా షర్మిల తన కుటుంబ సభ్యులు, కాబోయే వియ్యంకులైన రఘురామ్ రెడ్డి తల్లిదండ్రులతో కలిసి ఇడుపులపాయలోని దివంగత మాజీ ముఖ్యమంత్రి వైఎస్ రాజశేఖరరెడ్డి ఘాట్‌ను సందర్శించారు. అక్కడ తన కుమార్తె, కాబోయే అల్లుడి తొలి వివాహ ఆహ్వాన పత్రికను వైఎస్ఆర్ సమాధి వద్ద ఉంచి, ఆశీస్సులు తీసుకున్నారు. తండ్రి ఆశీస్సులతో ఈ శుభకార్యానికి శ్రీకారం చుడుతున్నట్లు తెలిపారు.

అనంతరం షర్మిల మాట్లాడుతూ.. "నాన్న స్వర్గీయ వైఎస్ రాజశేఖరరెడ్డి గారి ఆశీస్సులతో నా కుమార్తె అంజిలి రెడ్డి, సోమల రఘురామ్ రెడ్డిల వివాహ మహోత్సవం జరగనుంది. ఈ శుభవార్తను దేవుడి ఆశీర్వాదంతో నాన్న ఘాట్ వేదికగా మీతో పంచుకోవడం అత్యంత ఆనందంగా ఉంది" అని పేర్కొన్నారు. ఈ నెల 24న నిశ్చితార్థం, నవంబర్ 25న వివాహం, డిసెంబర్ 5న రిసెప్షన్ వేడుకలు నిర్వహించనున్నట్లు ఆమె వివరించారు.

నూతన వధూవరుల దాంపత్య జీవితం సుఖసంతోషాలతో సాగాలని ఆకాంక్షించారు. తన తండ్రి దీవెనలు బిడ్డల జీవితాలకు కొండంత అండగా నిలుస్తాయని, ఆయన చూపిన సన్మార్గం వారికి ఎల్లప్పుడూ ఆదర్శప్రాయమని షర్మిల భావోద్వేగంగా వ్యాఖ్యానించారు. వైఎస్ కుటుంబంలో జరుగుతున్న ఈ శుభకార్యం పట్ల పలువురు నేతలు, అభిమానులు శుభాకాంక్షలు తెలుపుతున్నారు.