ఆళ్ల నాని హఠాన్మరణంపై ముఖ్యమంత్రి చంద్రబాబు స్పందన

ఆంధ్రప్రదేశ్ రాష్ట్ర మాజీ ఉప ముఖ్యమంత్రి, టీడీపీ నేత ఆళ్ల నాని (కాళీ కృష్ణ శ్రీనివాస్) అకాల మరణం పట్ల ముఖ్యమంత్రి నారా చంద్రబాబు నాయుడు తీవ్ర దిగ్భ్రాంతి వ్యక్తం చేశారు. కేవలం 56 సంవత్సరాల వయసులోనే గుండెపోటుతో ఆళ్ల నాని దూరమవడం తనను తీవ్రంగా కలచివేసిందని ఆవేదన వ్యక్తం చేశారు. ఆయన కుటుంబ సభ్యులకు తన ప్రగాఢ సానుభూతిని తెలిపారు.

ఈ మేరకు చంద్రబాబు సోషల్ మీడియా వేదికగా తన సంతాప సందేశాన్ని పంచుకున్నారు. ఆళ్ల నాని గారి ఆత్మకు శాంతిని చేకూర్చాలని ఆ భగవంతుడిని కోరుకుంటున్నానని తన పోస్టులో పేర్కొన్నారు.

కాగా, ఆళ్ల నాని ఇవాళ విశాఖపట్నంలో గుండెపోటుకు గురై హఠాత్తుగా కన్నుమూసిన విషయం తెలిసిందే. ఆయన మృతి వార్త తెలియగానే రాజకీయ వర్గాల్లో విషాదం నెలకొంది. పలువురు రాజకీయ నాయకులు ఆయన మరణం పట్ల సంతాపం ప్రకటిస్తూ, ఆయన కుటుంబానికి సానుభూతి తెలియజేస్తున్నారు. సౌమ్యుడు, వివాదరహితుడైన నేతగా ఆళ్ల నానికి గుర్తింపు ఉంది.