ఎంఎన్‌పీ ఆఫర్లపై వివాదం.. వీఐపై ఎయిర్‌టెల్, జియో ఫిర్యాదు.. స్పందించిన ట్రాయ్

భారత టెలికాం రంగంలో మరోసారి వివాదం రాజుకుంది. మొబైల్ నెంబర్ పోర్టబిలిటీ (MNP) విషయంలో వొడాఫోన్ ఐడియా (వీఐ) అనుసరిస్తున్న తీరుపై అగ్రగామి సంస్థలైన భారతీ ఎయిర్‌టెల్, రిలయన్స్ జియో తీవ్ర అభ్యంతరం వ్యక్తం చేశాయి. ఈ మేరకు టెలికాం రెగ్యులేటరీ అథారిటీ ఆఫ్ ఇండియా (ట్రాయ్)కు ఫిర్యాదు చేశాయి.

తమ నెట్‌వర్క్‌లోకి మారే వినియోగదారులను ఆకర్షించేందుకు వొడాఫోన్ ఐడియా ప్రత్యేకంగా టారిఫ్ ప్రయోజనాలు, ప్రోత్సాహకాలను అందిస్తోందని ఎయిర్‌టెల్, జియో తమ ఫిర్యాదులో ఆరోపించాయి. ఇలా నిర్దిష్ట కస్టమర్లను లక్ష్యంగా చేసుకుని ఆఫర్లు ప్రకటించడం నిబంధనలకు విరుద్ధమని పేర్కొన్నాయి. ఈ ప్రత్యేక ఆఫర్లకు సంబంధించిన ప్రకటనలను, ఆఫర్లను వెంటనే ఉపసంహరించుకునేలా వొడాఫోన్ ఐడియాను ఆదేశించాలని ఆ రెండు కంపెనీలు ట్రాయ్‌ను కోరాయి.

ఈ ఫిర్యాదులపై ట్రాయ్ ఛైర్మన్ ఎ.కె. లహోటి స్పందించారు. టెలికాం కంపెనీలు లేవనెత్తిన ఆందోళనలను పరిశీలించి, ఈ సమస్యను పరిష్కరిస్తామని ఆయన తెలిపారు.

మరోవైపు, ఈ ఆరోపణలపై వొడాఫోన్ ఐడియా సైతం స్పందించింది. తాము ఎల్లప్పుడూ ఆరోగ్యకరమైన పోటీని కోరుకుంటామని, చట్టానికి లోబడే వ్యాపార కార్యకలాపాలు నిర్వహిస్తున్నామని స్పష్టం చేసింది. వినియోగదారులకు మెరుగైన సేవలు అందించడంపైనే తమ దృష్టి ఉందని వివరించింది. ఇటీవల మార్కెట్ వాటాను తిరిగి పొందేందుకు వొడాఫోన్ ఐడియా తమ లోగోను మార్చి, బ్రాండ్ అంబాసిడర్‌గా షారుఖ్ ఖాన్‌ను నియమించుకున్న నేపథ్యంలో ఈ వివాదం చోటుచేసుకోవడం గమనార్హం.