మోదీ పుట్టినరోజున 'మోదీ కథ'.. ప్రధానిలోని మానవీయ కోణంపై పుస్తకం

ప్రధానమంత్రి నరేంద్ర మోదీ పుట్టినరోజు సందర్భంగా ఆయనలోని మానవీయ కోణాన్ని, సున్నితత్వాన్ని ఆవిష్కరించే 'మోదీ కథ' అనే పుస్తకం సెప్టెంబర్ 17న విడుదల కానుంది. ఢిల్లీలోని ఇందిరా గాంధీ నేషనల్ సెంటర్ ఫర్ ఆర్ట్స్‌లో (IGNCA) జరిగే ఈ కార్యక్రమంలో కేంద్ర న్యాయ, పార్లమెంటరీ వ్యవహారాల సహాయ మంత్రి అర్జున్ రామ్ మేఘ్వాల్ ఈ పుస్తకాన్ని ఆవిష్కరించనున్నారు. ప్రముఖ జర్నలిస్ట్, రచయిత హరీశ్ చంద్ర బర్నవాల్ ఈ పుస్తకాన్ని రచించారు.

గత 25 ఏళ్లలో ప్రధాని మోదీ జీవితంలోని వివిధ ఘటనల ఆధారంగా, ఆయనలోని కరుణ, ఆప్యాయత, సున్నితత్వాన్ని తెలిపే 10 వాస్తవ గాథల సమాహారంగా ఈ పుస్తకాన్ని రూపొందించారు. వాస్తవాలు మెదడును సంతృప్తిపరిస్తే, కథలు నేరుగా హృదయంతో మాట్లాడతాయనే రీతిలో, సరళమైన భాషలో, భావోద్వేగ కథన శైలిలో రచయిత ఈ పుస్తకాన్ని తీర్చిదిద్దినట్లు ప్రచురణకర్తలు తెలిపారు.

1990లో జరిగిన ఓ రైలు ప్రయాణంలో యువ నాయకుడిగా ఉన్న మోదీ ప్రవర్తన, ఇద్దరు మహిళా ప్రయాణికులకు రాజకీయ నాయకులపై ఉన్న ప్రతికూల అభిప్రాయాన్ని ఎలా మార్చిందో ఈ పుస్తకంలో వివరించారు. అలాగే, నేపాల్‌కు చెందిన జీత్ బహదూర్ అనే బాలుడిని సాధారణ కార్యకర్తగా చేరదీసి, ప్రధాని అయ్యాక కూడా అతడిని మర్చిపోకుండా ఆలింగనం చేసుకున్న సందర్భాన్ని కూడా పొందుపరిచారు. దృష్టిలోపం ఉన్న పింకల్ అనే విద్యార్థిని పట్ల చూపిన సున్నితత్వం, కేంద్ర బడ్జెట్‌లో ప్రత్యేక కేటాయింపులకు ఎలా దారితీసిందో కూడా ఇందులో ప్రస్తావించారు.

ఆగ్రాకు చెందిన అమాయకురాలు తైబా ప్రాణాలను కాపాడటానికి తక్షణ సహాయం అందించడం, కర్ణాటకలోని హుబ్బళ్లికి చెందిన కార్మికుడు చంద్రకాంత్ వంటి ఎందరో సామాన్యుల సుఖదుఃఖాల్లో పాలుపంచుకున్న తీరును కూడా ఈ పుస్తకం వివరిస్తుంది. "విధానాలు, దస్త్రాలే పాలన కాదు.. సమాజంలో అట్టడుగున ఉన్న వ్యక్తి హృదయ స్పందనను అర్థం చేసుకోవడమే నిజమైన పాలన" అనే సందేశాన్ని ఈ కథల ద్వారా తెలియజేయడమే పుస్తక లక్ష్యమని ప్రకటనలో పేర్కొన్నారు.

ప్రధాని మోదీపై హరీశ్ బర్నవాల్ రాసిన ఐదో పుస్తకం ఇది. ప్రభాత్ ప్రకాశన్ దీనిని ప్రచురించింది. ప్రతి కథ చివరన, వాస్తవాలను నిర్ధారించే మూలాలను (సోర్సెస్) రచయిత పేర్కొనడం ఈ పుస్తకం ప్రత్యేకత. బర్నవాల్ గతంలో 'మోదీ సూత్ర', 'మోదీ నీతి', 'లార్డ్ ఆఫ్ రికార్డ్స్' వంటి పుస్తకాలను రాశారు. కేంద్ర ప్రభుత్వంచే ప్రతిష్ఠాత్మక 'భరతేందు హరిశ్చంద్ర' అవార్డును కూడా అందుకున్నారు.