ఆపరేషన్ అరణ్యలో తీవ్ర ఉద్రిక్తత.. స్మగ్లర్ల దాడిలో ముగ్గురు అటవీ సిబ్బందికి గాయాలు.. పవన్ ఆగ్రహం

ఆంధ్రప్రదేశ్‌లోని అన్నమయ్య జిల్లాలో ఎర్రచందనం స్మగ్లర్లు మరోసారి రెచ్చిపోయారు. తమను అడ్డుకునేందుకు ప్రయత్నించిన అటవీ శాఖ అధికారులపై వాహనంతో దాడికి తెగబడ్డారు. ఈ ఘటనలో ముగ్గురు అటవీ శాఖ సిబ్బంది తీవ్రంగా గాయపడ్డారు. ఆదివారం రొంపిచర్ల మండలం బొమ్మయ్యగారిపల్లి సమీపంలో ఈ సంఘటన చోటుచేసుకుంది.

వివరాల్లోకి వెళితే, ఎర్రచందనం దుంగలను అక్రమంగా తరలిస్తున్నారన్న పక్కా సమాచారంతో అటవీ శాఖ సిబ్బంది 'ఆపరేషన్ అరణ్య' చేపట్టారు. ఇందులో భాగంగా స్మగ్లర్ల వాహనాన్ని అడ్డుకునేందుకు తమ పెట్రోలింగ్ వాహనాన్ని రోడ్డుకు అడ్డంగా నిలిపారు. అయితే, అక్కడికి వేగంగా దూసుకొచ్చిన స్మగ్లర్లు ఆగకుండా, అధికారుల వాహనాన్ని బలంగా ఢీకొట్టి పారిపోయేందుకు ప్రయత్నించారు. ఈ ఘటనలో అటవీ శాఖ వాహనంతో పాటు స్మగ్లర్ల వాహనం కూడా దెబ్బతింది.

ఈ దాడిలో ఫారెస్ట్ సెక్షన్ ఆఫీసర్ కె. ప్రకాశ్ కుమార్, ఫారెస్ట్ బీట్ ఆఫీసర్లు పి. రెడ్డి ప్రసాద్, కె. ప్రతాప్‌లతో పాటు వాహన డ్రైవర్ చరణ్‌కు గాయాలయ్యాయి. అయినప్పటికీ, అటవీ సిబ్బంది ప్రాణాలకు తెగించి ఇద్దరు స్మగ్లర్లను అదుపులోకి తీసుకున్నారు. స్మగ్లర్లలో ఇద్దరు గాయపడ్డారు. 

గాయపడిన సిబ్బందిని మెరుగైన చికిత్స నిమిత్తం తిరుపతిలోని ఎస్వీఆర్ఆర్ ప్రభుత్వ ఆసుపత్రికి తరలించారు. ప్రస్తుతం వారి ఆరోగ్యం నిలకడగా ఉందని అధికారులు తెలిపారు. ఘటనా స్థలం నుంచి ఎర్రచందనం దుంగలు, ఒక తూకం యంత్రం, రంపం, గొడ్డళ్లు, స్మగ్లింగ్‌కు ఉపయోగించిన వాహనాన్ని స్వాధీనం చేసుకున్నారు. మరో ముగ్గురు స్మగ్లర్లు పరారీలో ఉన్నట్లు గుర్తించారు.

ఘటనపై డిప్యూటీ సీఎం పవన్ కల్యాణ్ సీరియస్

అటవీ సిబ్బందిపై జరిగిన దాడి ఘటనపై ఉప ముఖ్యమంత్రి, అటవీ శాఖ మంత్రి పవన్ కల్యాణ్ తీవ్రంగా స్పందించారు. అటవీ శాఖ ఉన్నతాధికారులతో ఫోన్‌లో మాట్లాడి ఘటన వివరాలు తెలుసుకున్నారు. ప్రాణాలకు తెగించి స్మగ్లర్లను పట్టుకున్న అధికారుల ధైర్యాన్ని ఆయన అభినందించారు. గాయపడిన సిబ్బందికి మెరుగైన వైద్యం అందించాలని, చికిత్స ఖర్చు మొత్తం ప్రభుత్వమే భరిస్తుందని హామీ ఇచ్చారు. సిబ్బంది పూర్తిగా కోలుకునే వరకు పీసీసీఎఫ్ పర్యవేక్షించాలని ఆదేశించారు.

అటవీ సంపదను దోచుకునే వారిపై కఠిన చర్యలు తీసుకుంటామని, ఈ విషయంలో ఎలాంటి రాజీకి తావులేదని పవన్ కల్యాణ్ స్పష్టం చేశారు. విధి నిర్వహణలో ఉన్న ప్రభుత్వ సిబ్బందిపై దాడులకు పాల్పడే వారిపై అత్యంత కఠినమైన చట్టపరమైన చర్యలు తీసుకోవాలని ఆదేశించారు. అటవీ నేరాలను అరికట్టడంలో తమ కూటమి ప్రభుత్వం దృఢ నిశ్చయంతో ఉందని ఆయన పునరుద్ఘాటించారు. పరారీలో ఉన్న మిగతా ముగ్గురు నిందితులను వెంటనే అరెస్ట్ చేయాలని, స్మగ్లింగ్ ముఠాలపై ప్రత్యేక నిఘా ఉంచాలని రెడ్ శాండర్స్ యాంటీ స్మగ్లింగ్ టాస్క్ ఫోర్స్ అధికారులను ఆదేశించారు.