బ్రిక్స్ విందులో పాట పాడిన మలేషియా ప్రధాని.. హిందీ క్లాసిక్‌తో అదరగొట్టిన అన్వర్ ఇబ్రహీం.. ఇదిగో వీడియో!

ఢిల్లీలో జ‌రుగుతున్న‌ 18వ బ్రిక్స్ శిఖరాగ్ర సదస్సులో ఒక ఆసక్తికర సాంస్కృతిక ఘట్టం చోటుచేసుకుంది. సదస్సుకు హాజరైన దేశాధినేతల కోసం ప్రధాని నరేంద్ర మోదీ ఏర్పాటు చేసిన గాలా డిన్నర్‌లో మలేషియా ప్రధాని అన్వర్ ఇబ్రహీం ఒక పాత హిందీ పాట పాడి అందరినీ ఆశ్చర్యపరిచారు. తన గానంతో ఆ సాయంత్రాన్ని మరింత ప్రత్యేకంగా మార్చారు.

నిన్న రాత్రి ఢిల్లీలోని ప్రఖ్యాత భారత్ మండపంలో ఈ విందు కార్యక్రమం జరిగింది. ఈ సందర్భంగా అన్వర్ ఇబ్రహీం, 1965 నాటి 'తీన్ దేవియా' చిత్రంలోని కిషోర్ కుమార్ ఆలపించిన క్లాసిక్ గీతం "ఖ్వాబ్ హో తుమ్ యా కోయీ హకీకత్"ను పియానిస్ట్ సహకారంతో మధురంగా ఆలపించారు. ఎస్.డి. బర్మన్ స్వరపరిచిన ఈ గీతానికి మజ్రూహ్ సుల్తాన్‌పురి సాహిత్యం అందించారు. 

ఈ ప్రదర్శనకు సంబంధించిన వీడియోను అన్వర్ తన 'ఎక్స్‌' సోషల్ మీడియా ఖాతాలో స్వయంగా పంచుకున్నారు. "కొద్దిసేపు పాడేందుకు అనుమతి కోరుతున్నా" అనే అర్థం వచ్చేలా ఒక క్యాప్షన్ కూడా జతచేశారు.

ఈ వీడియో పోస్ట్ చేసిన కొద్దిసేపటికే సోషల్ మీడియాలో వైరల్ అయింది. భారతీయ సినిమా, సంగీతం పట్ల అన్వర్ ఇబ్రహీంకు ఉన్న అభిమానంపై నెటిజన్లు ప్రశంసలు కురిపించారు. ఆయన ఈ పాట పాడటం ఇదే మొదటిసారి కాదు. 2024లో భారత్‌కు వచ్చినప్పుడు కూడా ఇదే గీతాన్ని ఆలపించి తన అభిమానాన్ని చాటుకున్నారు.

బ్రిక్స్ భాగస్వామ్య దేశంగా మలేషియా ఈ సదస్సులో పాల్గొంది. ఈ పర్యటనలో భాగంగా అంతకుముందు అన్వర్ ఇబ్రహీం ప్రధాని మోదీతో ద్వైపాక్షిక సమావేశంలో కూడా పాల్గొన్నారు. రెండు రోజుల పాటు జరిగిన ఈ సదస్సులో ప్రపంచ పాలన, ఆర్థిక సహకారం, అభివృద్ధి చెందుతున్న దేశాలు ఎదుర్కొంటున్న సమస్యలపై నేతలు చర్చించారు. సదస్సు ముగింపులో 'న్యూఢిల్లీ డిక్లరేషన్'ను ఆమోదించారు. ఈ గంభీరమైన వాతావరణంలో మలేషియా ప్రధాని పాట ఆహ్లాదకరమైన మార్పును తీసుకొచ్చింది.