మోదీ విందుకు పుతిన్ హాజరు.. దూరంగా చైనా అధ్యక్షుడు

న్యూఢిల్లీ వేదికగా జరిగిన 18వ బ్రిక్స్ సదస్సులో ఒక ఆసక్తికర పరిణామం చోటుచేసుకుంది. ప్రధాని నరేంద్ర మోదీ శనివారం ఏర్పాటు చేసిన గాలా డిన్నర్‌కు చైనా అధ్యక్షుడు జిన్‌పింగ్ హాజరుకాలేదు. రష్యా అధ్యక్షుడు వ్లాదిమిర్ పుతిన్‌తో పాటు ఇతర దేశాధినేతలు ఈ విందులో పాల్గొన్నారు. జిన్‌పింగ్ గైర్హాజరుపై చర్చ మొదలైనప్పటికీ, ఆయన విశ్రాంతి తీసుకునేందుకే హోటల్‌కు వెళ్లారని తెలిసింది.

సదస్సులో పాల్గొని, ప్రధాని మోదీతో ద్వైపాక్షిక చర్చలు జరిపిన అనంతరం జిన్‌పింగ్ అలసట కారణంగా విశ్రాంతి తీసుకున్నట్లు సమాచారం. ఆయనతో పాటు అబు ధాబి క్రౌన్ ప్రిన్స్ కూడా సదస్సు ముగిశాక స్వదేశానికి తిరిగి వెళ్లడంతో విందుకు గైర్హాజరయ్యారు. సెప్టెంబర్ 12, 13 తేదీల్లో జరిగిన ఈ సదస్సులో 11 సభ్య దేశాలు, 10 భాగస్వామ్య దేశాలు పాలుపంచుకున్నాయి.

ఇదిలా ఉండగా, ఈ సదస్సులో "న్యూఢిల్లీ డిక్లరేషన్ 2026"ను ఏకగ్రీవంగా ఆమోదించినట్లు ప్రధాని మోదీ ప్రకటించారు. "ఈ డిక్లరేషన్‌పై ఏ సభ్య దేశం అభ్యంతరం చెప్పలేదు. ఇది చర్చల సారాంశాన్ని ప్రతిబింబిస్తూ, ఉమ్మడి లక్ష్యాలకు స్పష్టమైన దిశానిర్దేశం చేస్తుంది" అని ప్రధాని వివరించారు. పశ్చిమాసియాలో ఉద్రిక్తతల నియంత్రణ, ఐక్యరాజ్యసమితి భద్రతా మండలి (యూఎన్ఎస్‌సీ) సంస్కరణలు, ఉగ్రవాదాన్ని ఖండించడం వంటి కీలక అంశాలు ఈ డిక్లరేషన్‌లో ఉన్నాయి.

వచ్చే ఏడాది బ్రిక్స్ అధ్యక్ష బాధ్యతలను చైనా చేపడుతుందని జిన్‌పింగ్ ఇదే సదస్సులో ప్రకటించారు.