భార్యను ప్రియుడితో కలిపిన భర్త.. దగ్గరుండి పెళ్లి చేసిన అరుదైన ఘటన!

ఉత్తరప్రదేశ్‌లోని లక్నోలో ఒక విచిత్రమైన ఘటన చోటుచేసుకుంది. ఓ భర్త తన భార్యను ఆమె స్కూల్ నాటి ప్రియుడితో కలిపి పంపడమే కాకుండా, దగ్గరుండి పెళ్లి జరిపించాడు. ప్రాంతీయ రక్షక దళ్ (పీఆర్‌డీ) జవాన్‌గా పనిచేస్తున్న విక్కీ అనే వ్యక్తి తీసుకున్న ఈ నిర్ణయం సామాజిక మాధ్యమాల్లో చర్చనీయాంశంగా మారింది.

లక్నోకు చెందిన విక్కీకి, సోనాలికి సుమారు ఏడాది క్రితం కుటుంబ సభ్యులు వివాహం జరిపించారు. అయితే, సోనాలికి అప్పటికే తన స్కూల్ రోజుల స్నేహితుడితో ప్రేమ వ్యవహారం ఉంది. పెళ్లి తర్వాత కూడా ఆమె తన ప్రియుడితో ఫోన్‌లో మాట్లాడుతూ సంబంధాన్ని కొనసాగించింది. ఈ క్రమంలో సెప్టెంబర్ 5న సోనాలి అత్తవారింటి నుంచి అకస్మాత్తుగా అదృశ్యమైంది. కుటుంబ సభ్యులు ఎంత వెతికినా ఆచూకీ లభించకపోవడంతో విక్కీ పోలీసులకు ఫిర్యాదు చేశాడు.

మిస్సింగ్ కేసు నమోదు చేసిన పోలీసులు, సమీప జిల్లాలను అప్రమత్తం చేశారు. దర్యాప్తులో భాగంగా సోనాలి హర్దోయ్‌లో తన ప్రియుడితో ఉన్నట్లు గుర్తించి, బుధవారం వారిద్దరినీ పోలీస్ స్టేషన్‌కు తీసుకువచ్చారు. పోలీస్ స్టేషన్‌లో జరిగిన చర్చల సందర్భంగా సోనాలి "నేను ఒక్క క్షణం కూడా నా భర్తతో ఉండలేను. నా జీవితాన్ని నా ప్రియుడితోనే గడపాలనుకుంటున్నాను" అని కుటుంబ సభ్యులు, పోలీసుల ఎదుట స్పష్టంగా చెప్పింది. ఆమె నిర్ణయానికి మొదట ఆశ్చర్యపోయిన విక్కీ, ఆ తర్వాత పరిస్థితిని అర్థం చేసుకున్నాడు. "ఇందులో బలవంతం ఏమీ లేదు. నువ్వు ఎవరితో సంతోషంగా ఉంటావో వాళ్లతోనే ఉండు" అని భార్యకు చెప్పాడు.

అనంతరం ఇరు పక్షాల అంగీకారంతో చట్టపరమైన లాంఛనాలను పూర్తి చేశారు. స్థానికంగా ఉన్న ఒక గుడిలో హిందూ సంప్రదాయం ప్రకారం సోనాలి, ఆమె ప్రియుడు వివాహం చేసుకున్నారు. విక్కీ స్వయంగా తన భార్యను ఆమె ప్రియుడికి అప్పగించి, వారి వివాహాన్ని జరిపించడం గమనార్హం. ఈ విషయంపై మలిహాబాద్ పోలీస్ ఇన్‌స్పెక్టర్ సురేంద్ర భాటి మాట్లాడుతూ.. ఇరు పక్షాల అంగీకారంతోనే ఈ వ్యవహారం పరిష్కారమైందని, ఎవరూ ఫిర్యాదు చేయలేదని తెలిపారు.