తల్లిదండ్రుల వద్దకు పంపించాలని.. కోర్టులో కన్నీళ్లు పెట్టుకున్న పాకిస్థాన్ హిందూ బాలికలు

పాకిస్థాన్‌లో మైనారిటీలపై దాడులు నిరంతరాయంగా కొనసాగుతున్నాయి. తాజాగా సింధ్ ప్రావిన్స్‌లో 13, 14 ఏళ్ల వయసు గల ఇద్దరు హిందూ సోదరీమణులను అపహరించి, బలవంతంగా ఇస్లాం మతంలోకి మార్చి వివాహం చేసిన ఘటన తీవ్ర కలకలం సృష్టిస్తోంది.

అపహరణకు గురైన ఈ మైనర్ బాలికలకు అహ్మద్ సోలంగి, మన్సూర్ సోలంగి అనే యువకులతో వివాహం జరిపించారు. ఈ కేసు కోర్టు విచారణకు వచ్చిన సందర్భంగా, సదరు బాలికలు న్యాయమూర్తి ఎదుట కన్నీరుమున్నీరయ్యారు. తమను వెంటనే తల్లిదండ్రుల వద్దకు పంపాలని వేడుకున్నారు. అయితే, న్యాయస్థానం వారిని తల్లిదండ్రులకు అప్పగించేందుకు నిరాకరించింది. వారిని ఒక సంరక్షణ కేంద్రానికి (ప్రొటెక్షన్ హోమ్) తరలించాల్సిందిగా ఆదేశాలు జారీ చేసింది.

గడిచిన పది రోజుల వ్యవధిలోనే తాండో అల్లాహ్యార్ జిల్లా నుంచి ఆరుగురు మైనర్ బాలికలు అపహరణకు గురయ్యారని ఓ పాకిస్థానీ జర్నలిస్ట్ వీడియో ద్వారా వెల్లడించారు. పాకిస్థాన్‌లో ఇటువంటి అకృత్యాలు నిత్యకృత్యమయ్యాయని మైనారిటీ హక్కుల సంఘాలు సుదీర్ఘకాలంగా ఆందోళన వ్యక్తం చేస్తున్నాయి.

ఈ పరిణామాలపై అంతర్జాతీయ మానవ హక్కుల సంస్థ 'ఆమ్నెస్టీ ఇంటర్నేషనల్' తీవ్రంగా స్పందించింది. పాకిస్థాన్‌లో ప్రతి ఏటా వందలాది మంది హిందూ మహిళలు, బాలికలు కిడ్నాప్‌లకు, బలవంతపు మత మార్పిడులకు, వివాహాలకు గురవుతున్నారని పేర్కొంది. హిందూ మైనారిటీలపై కొనసాగుతున్న ఈ వివక్ష పట్ల ఆ సంస్థ తీవ్ర ఆందోళన వ్యక్తం చేసింది.