ఓటీటీలోకి పరిణీతి చోప్రా.. ఉత్కంఠ రేపుతున్న తొలి వెబ్ సిరీస్

బాలీవుడ్ నటి పరిణీతి చోప్రా తన కెరీర్‌లో కొత్త అడుగు వేస్తున్నారు. వెండితెరపై తన నటనతో ఆకట్టుకున్న ఆమె, ఇప్పుడు డిజిటల్ రంగంలోకి ప్రవేశిస్తున్నారు. పరిణీతి ప్రధాన పాత్రలో నటించిన తొలి వెబ్ సిరీస్ "షక్: ట్రస్ట్ నో వన్" త్వరలో ప్రేక్షకుల ముందుకు రానుంది. ప్రముఖ ఓటీటీ ప్లాట్‌ఫామ్ నెట్‌ఫ్లిక్స్‌లో ఈ మిస్టరీ థ్రిల్లర్ సిరీస్ సెప్టెంబర్ 24 నుంచి స్ట్రీమింగ్ కానుంది.

ఈ సిరీస్ కథాంశం ఎంతో ఆసక్తికరంగా ఉండనుంది. తొమ్మిదేళ్లుగా ఆచూకీ లేని తన బిడ్డ కోసం ఒక తల్లి చేసే అలుపెరగని అన్వేషణే దీని ప్రధాన ఇతివృత్తం. నమ్మకం-అనుమానం, ప్రేమ-వ్యామోహం, అంతర్ దృష్టి-నిజం మధ్య ఉండే సన్నని గీతను స్పృశిస్తూ ఈ కథ ముందుకు సాగుతుంది. భావోద్వేగాలతో కూడిన డ్రామాతో పాటు చివరి వరకు ఉత్కంఠ రేపే థ్రిల్లర్ అంశాలు ఇందులో మిళితమై ఉంటాయని తెలుస్తోంది.

ఈ సిరీస్‌ను రెన్సిల్ డిసిల్వా, సిద్ధార్థ్ పి. మల్హోత్రా రూపొందించగా, రెన్సిల్ డిసిల్వానే దర్శకత్వ బాధ్యతలు చేపట్టారు. ఆల్కెమీ ఫిల్మ్స్ పతాకంపై దీనిని నిర్మించారు. పరిణీతితో పాటు సోనీ రజ్దాన్, అనుప్ సోనీ, జెన్నిఫర్ వింగెట్, తాహిర్ రాజ్ భాసిన్, హర్లీన్ సేథి, ధ్రువ్ చౌదరి, సుమీత్ వ్యాస్ వంటి భారీ తారాగణం ఈ సిరీస్‌లో కీలక పాత్రలు పోషిస్తోంది.

ఈ సిరీస్ ఎంతో వేగవంతమైన కథనంతో, ఊహించని మలుపులతో ప్రేక్షకులను కట్టిపడేస్తుందని మేకర్స్ చెబుతున్నారు. కథలో వెల్లడయ్యే ప్రతి నిజం, మరిన్ని కొత్త ప్రశ్నలను రేకెత్తించి, ప్రేక్షకులలో ఆసక్తిని నిరంతరం పెంచుతుందని నెట్‌ఫ్లిక్స్ ఇండియా ప్రతినిధులు తెలిపారు. పరిణీతి కెరీర్‌లో ఇది ఒక ప్రత్యేకమైన ప్రాజెక్ట్‌గా నిలుస్తుందని అంచనాలు వెలువడుతున్నాయి.